ठाकरे बंधूंच्या युतीतील तणावानंतर संजय राऊत ‘शिवतीर्थ’वर! नेमकं काय घडलं?
राज ठाकरे आणि उद्धव ठाकरे यांच्यातील राजकीय तणाव वाढत असताना, संजय राऊत यांनी राज ठाकरे यांची शिवतीर्थ येथे भेट घेतली. स्वीकृत नगरसेवक आणि प्रभाग समिती अध्यक्षपदाचे प्रस्ताव राज ठाकरेंनी नाकारल्याने हा तणाव निर्माण झाला. मनसेच्या तटस्थ भूमिकेमुळे शिवसेना (उद्धव बाळासाहेब ठाकरे) उमेदवारांना फटका बसण्याची शक्यता असून, महायुतीला फायदा होऊ शकतो.
संजय राऊत यांनी राज ठाकरे यांच्या शिवतीर्थ निवासस्थानी भेट घेतली आहे. राज ठाकरे आणि उद्धव ठाकरे यांच्यातील वाढत्या राजकीय तणावाच्या पार्श्वभूमीवर ही भेट महत्त्वाची मानली जात आहे. मुंबई महानगरपालिका निवडणुकीनंतर ठाकरे बंधूंमध्ये स्वीकृत नगरसेवक पदावरून तणाव निर्माण झाला होता. आता उद्धव ठाकरे यांनी मनसेला प्रभाग समिती अध्यक्ष पद देण्यासंदर्भात दिलेला प्रस्तावही राज ठाकरे यांनी नाकारला आहे.
या भेटीत राऊत यांनी राज ठाकरेंसोबत चर्चा केली. राज ठाकरेंनी प्रस्ताव नाकारल्यामुळे 5 मार्च रोजी होणाऱ्या प्रभाग समिती अध्यक्षपदाच्या निवडणुकीत मनसे तटस्थ भूमिका घेणार असल्याची माहिती मिळत आहे. मनसेच्या या भूमिकेमुळे शिवसेना (उद्धव बाळासाहेब ठाकरे) पक्षाच्या उमेदवारांना फटका बसू शकतो, तर महापालिकेत सत्तेत असलेल्या महायुतीला याचा फायदा होण्याची शक्यता आहे. ठाकरे बंधूंमधील संबंधांमधील कटुता वाढल्याचे यातून स्पष्ट होत आहे.
