Uday Samant : उदय सामंत अन् संदीपान भुमरेंनी घेतली जरांगे पाटलांची भेट, कारण काय? काय झाली चर्चा?

शिवसेना नेते, राज्याचे मंत्री उदय सामंत आणि खासदार संदीपान भुमरे यांनी आज मनोज जरांगे पाटील यांची अचानक भेट घेतल्याचे पाहायला मिळाले. बीड जिल्ह्यातील शहागड येथील मनोज जरांगे पाटील यांच्या कार्यालयात उदय सामंत आणि संदीपान भुमरे यांनी भेट घेतली. या भेटीनंतर उदय सामंत यांनी यासंदर्भात प्रतिक्रिया दिली आहे. ही भेट कोणतीही गोपनीय अशी भेट नव्हती. कॅमेऱ्यासमोर सगळ्या गप्पा झाल्या आहेत, असे म्हणत असताना जरांगे पाटील आणि आमचे संबंध आहेत, म्हणून त्यांना भेटायला आलो आहे. आज जरांगे पाटील यांनी सामाजिक स्तरावरचे मुद्दे सांगितले आणि ते मुद्दे घेऊन आम्ही 23 तारखेला मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांना भेटणार असल्याचे उदय सामंत यांनी सांगितले. पुढे त्यांनी असेही सांगितले की, हैदराबाद गॅजेट लागू करण्यासंदर्भात किंवा शिंदे समितीला वेळ वाढवून देण्याची समितीला कामाला लावणे या संदर्भात आम्ही 23 तारखेला मुख्यमंत्री आणि उपमुख्यमंत्री यांच्याशी बोलणार आहे.