Pune AB form Controversy : शिवसेना उमेदवारानं खरंच प्रतिस्पर्धीचा AB फॉर्म खाल्ला? ‘त्या’ आरोपांवर उद्धव कांबळे काय म्हणाले?

पुणेच्या धनकवडी येथील एबी फॉर्म वादप्रकरणी शिवसेना उमेदवार उद्धव कांबळे यांनी आपली भूमिका स्पष्ट केली आहे. त्यांच्यावर प्रतिस्पर्धी उमेदवाराचा एबी फॉर्म गिळल्याचा किंवा चावून खाल्ल्याचा आरोप होता. कांबळे यांनी हे आरोप फेटाळले असले तरी, निवडणूक आयोगाच्या कार्यालयात तो फॉर्म आपल्या हातून फाटला गेल्याचे त्यांनी मान्य केले आहे. उद्धव कांबळे यांनी संबंधित उमेदवार मच्छिंद्र ढवळे यांचा शिवसेनेशी संबंध नसल्याचा दावा केला. ढवळे हे भाजपशी संबंधित असल्याचे त्यांनी नमूद केले. कांबळे यांच्या म्हणण्यानुसार, शिवसेना (शिंदे गट) नेतृत्वाने ३० ऑक्टोबर रोजी त्यांना अधिकृत उमेदवार म्हणून जाहीर केले असून, त्याबाबत निवडणूक आयोगाला पत्रही दिले आहे. कांबळेंनी आपल्यावरील आरोपांवरून वैद्यकीय तपासणीची मागणी केली. जर पोटात फॉर्मचे अंश आढळले, तर कारवाईस सामोरे जाण्याची तयारी त्यांनी दर्शवली. अन्यथा, त्यांच्यावरील गुन्हा रद्द करण्याची मागणी त्यांनी केली.