Sanjay Raut On Shivsena Hearing | आम्ही निश्चिंत आहोत…संविधानाशी द्रोह करणाऱ्यांचा शेवट कायद्यानेच होईल; सुनावणीनंतर संजय राऊतांचा इशारा!

शिवसेना पक्षाचे नाव आणि ‘धनुष्यबाण’ या निवडणूक चिन्हाच्या मालकी हक्कासंदर्भातील वादावर सर्वोच्च न्यायालयात सुरू असलेल्या सुनावणीदरम्यान ठाकरे गटाचे खासदार संजय राऊत यांनी महत्त्वपूर्ण प्रतिक्रिया दिली आहे. काल न्यायालयात ठाकरे गटाच्या वतीने ज्येष्ठ विधिज्ञ कपिल सिब्बल यांनी जोरदार युक्तिवाद मांडल्यानंतर राऊत यांनी या प्रकरणाला देशाच्या लोकशाही आणि संविधानाशी संबंधित ऐतिहासिक खटला असल्याचे म्हटले.

माध्यमांशी संवाद साधताना संजय राऊत म्हणाले की, “हा केवळ शिवसेना पक्षाचा खटला नाही, तर देशातील लोकशाही आणि संविधानाच्या भवितव्याशी संबंधित ऐतिहासिक खटला आहे. या प्रकरणाचे गांभीर्य सर्वोच्च न्यायालयालाही पूर्णपणे माहीत आहे. काल न्यायालयीन कामकाजादरम्यान न्यायमूर्तींचे निरीक्षण करताना मला ही जाणीव प्रकर्षाने झाली.”

राऊत यांनी पुढे सांगितले की, या प्रकरणातील सर्वोच्च न्यायालयाचा निर्णय देशाच्या लोकशाहीवर दूरगामी परिणाम करणारा ठरेल. “आम्ही पूर्णपणे निश्चिंत आहोत. कायदा आपले काम करेल. ज्यांनी बेईमानी केली, ज्यांनी संविधानाशी द्रोह केला, त्यांच्यावर कायद्याच्या चौकटीत कारवाई होईल आणि न्याय मिळेल, यावर आमचा पूर्ण विश्वास आहे,” असे ते म्हणाले.

दरम्यान, शिवसेना पक्षाचे नाव आणि ‘धनुष्यबाण’ चिन्हाच्या मालकी हक्काच्या या बहुचर्चित प्रकरणाची सुनावणी आजही सर्वोच्च न्यायालयात सुरू राहणार आहे. आजच्या सुनावणीत न्यायालय कोणती भूमिका घेते आणि पुढील कायदेशीर प्रक्रिया कशी पुढे सरकते, याकडे महाराष्ट्रासह संपूर्ण देशाचे लक्ष लागले आहे.