निवडणूक आयोगाचा ठाकरेंना झटका; सुषमा अंधारे-प्रवीण दरेकर भिडले, नेमकं प्रकरण काय?

केंद्रीय निवडणूक आयोगाने राज्य निवडणूक आयोगाला उद्धव ठाकरे यांच्यावर कारवाई करण्याचे आदेश दिले आहेत. निवडणूक आयोगाच्या दिरंगाईमुळे मतदान केंद्राबाहेर मतदारांच्या लांबच्या लांब रांगा लागल्या. अखेर कंटाळून अनेक मतदारांनी रांगेतून बाहेर पडत मतदान न करण्याचा निर्णय घेतला, असा आरोप उद्धव ठाकरे यांनी केला होता. मुंबईत संथगतीने मतदान होत असल्याचा आरोप करत उद्धव ठाकरे यांनी आचारसंहितादरम्यान मतदान सुरु असताना २० मे रोजी संध्याकाळी पाच वाजता पत्रकार परिषद घेतली. यावर केंद्रीय निवडणूक आयोगाने आक्षेप घेतला आहे. या प्रकरणावरूनच ठाकरे गटाच्या नेत्या सुषमा अंधारे आणि भाजप नेते प्रवीण दरेकर भिडले आहेत. अंधारे म्हणाल्या, भाजप नेते आशिष शेलार यांची निवडणूक आयोगात जास्त ओळख दिसत आहे. त्यांनी एक शिफारस आमच्यासाठी देखील करावी. कारण ठाण्यामधील एक व्हिडीओ आम्ही ट्विट केला. आयोगाकडे तक्रार केली. पण आयोगाने दखलच घेतली नाही. बीडमध्ये बुथ कॅपचरिंग, दमदाटी, पैसे वाटप यांचे व्हिडीओ शेअर केले. पण निवडणूक आयोगाने दखल घ्यावी. शेलार यांनी आमच्यावतीने निवडणूक आयोगाला शिफारस करावी, अशी आमची विनंती आहे, असा खोचक टोला सुषमा अंधारे यांनी लगावला.