Thackeray Brothers : उद्धव-राज ठाकरे युती दिल और दिमाग से पक्की… राऊतांच्या दाव्यानं खळबळ, नेमकं काय म्हणाले?

गेल्या तीन महिन्यांपासून उद्धव ठाकरे आणि राज ठाकरे यांच्या संभाव्य युतीची चर्चा राजकीय वर्तुळात सुरू आहे. आता खासदार संजय राऊत यांनी या युतीवर शिक्कामोर्तब करत ती दिल और दिमाग से बनी युती असल्याचे म्हटले आहे. एका कौटुंबिक कार्यक्रमानंतर दोन्ही ठाकरे बंधूंनी मातोश्रीवर राजकीय चर्चा केली. या चर्चेत मुंबई, ठाणे, कल्याण-डोंबिवली, पुणे आणि नाशिक या पाच महत्त्वाच्या महानगरपालिकांवर एकत्र काम करण्याबाबत एकमत झाल्याचे राऊत यांनी सांगितले.

संजय राऊत यांच्या दाव्यानुसार, ठाकरे बंधू एकत्र आल्यास आगामी मुंबई महानगरपालिका निवडणुकीत ते भारतीय जनता पक्ष, एकनाथ शिंदे गट शिवसेना आणि अजित पवार गट राष्ट्रवादी काँग्रेसच्या महायुतीला आव्हान देऊ शकतात. मुंबई महानगरपालिकेत उद्धव ठाकरे गटाची तीस वर्षांपासून सत्ता असल्याने ही निवडणूक दोन्ही गटासाठी महत्त्वाची मानली जात आहे.

मनसेसाठीही पक्षाच्या अस्तित्वासाठी ही निवडणूक कळीची आहे. विरोधी पक्षातील काही नेत्यांनी राऊतांच्या दाव्यावर टीका करत, मुंबईचा महापौर महायुतीचाच होईल असे म्हटले आहे. उद्धव ठाकरे यांनीही एकत्र राहण्याचे संकेत दिले असले, तरी मनसेने अद्याप अधिकृत घोषणा करण्याबाबत घाई दाखवलेली नाही.