Washim | वाशिममध्ये पावसाने शेतकऱ्यांचं कंबरडं मोडलं! सोयाबीन-तूर-कापूस पिकं उद्ध्वस्त, महिला शेतकरी व्यथा मांडताना ढसाढसा रडली

वाशिम जिल्ह्यात गेल्या सव्वा महिन्यापासून पावसाने ओढ दिल्याने शेती पिकांचे मोठे नुकसान झाले आहे. विशेषतः सोयाबीन, तूर आणि कपाशी या पिकांना याचा मोठा फटका बसला आहे. जिल्ह्याच्या कारंजा, मानोरा, मंगरुळपीर, मालेगाव आणि वाशिम तालुक्यांमध्ये पिकांचे सर्वाधिक नुकसान झाले आहे. पावसाअभावी सोयाबीन पीक पूर्णतः नष्ट झाले असून, शेतकऱ्यांचे लाखो रुपयांचे भांडवल वाया गेले आहे.

मालेगाव तालुक्यातील पांढरी धनकुटे येथील एका महिला शेतकऱ्याने आपली व्यथा मांडताना डोळ्यात अश्रू आणले. चार एकर सोयाबीन पेरणीसाठी एकरी २५ हजार रुपये खर्च आला, मात्र आता काहीच हाती लागणार नाही अशी त्यांची भावना आहे. लेकराबाळांचे शिक्षण आणि कुटुंबाचा उदरनिर्वाह कसा चालवायचा, या चिंतेने शेतकरी हवालदिल झाले आहेत. शासनाने तातडीने एकरी २५ हजार रुपये किंवा हेक्टरी एक लाख रुपये नुकसानभरपाई द्यावी, अशी मागणी शेतकरी करत आहेत.