ED Raid On Anil Ambani : 3,716 कोटीचं घर जप्त, त्यानंतर आता..अनिल अंबानी यांना ईडीचा मोठा दणका
ED Raid On Anil Ambani : प्रसिद्ध उद्योगपती अनिल अंबानी यांना आज पुन्हा एकदा ईडीने झटका दिला आहे. अनिल अंबानी यांच्या समूहाशी संबंधित कंपन्या या ईडीच्या रडारवर आहेत.
प्रसिद्ध उद्योगपती अनिल अंबानी यांना आज पुन्हा एकदा ईडीने झटका दिला. अनिल अंबानी यांच्या समूहाशी संबंधित कंपन्यांवर ईडीकडून छापेमारीची कारवाई सुरु आहे. 10 ते 12 ठिकाणी ईडीकडून ही छापेमारीची कारवाई सुरु आहे. ईडीच्या 15 टीम्स या कारवाईमध्ये सहभागी झाल्या आहेत. रिलायन्स पावर लिमिटेडवर ही छापेमारी करण्यात आल्याचं सांगण्यात येतय. बँक घोटाळा प्रकरणात अनिल अंबानी यांच्याविरोधात ईडीकडून ही कारवाई सुरु आहे. बँकेकडून कर्ज घेताना अनियिमितता झाल्याचं हे प्रकरण आहे. अनिल अंबानी यांचं मुंबईतील घर ईडीने जप्त केलं आहे. त्याशिवाय अनिल अंबानी स्वत: अनेकवेळा ईडी समोर चौकशीसाठी हजर झाले आहेत.
याआधी ईडीकडून त्यांच्याविरोधात मनी लॉन्ड्रिंग विरोधी कायद्यांतर्गत कारवाई करण्यात आली आहे. या संदर्भात पीटीआयने दिलेल्या माहितीनुसार ईडीकडून या प्रकरणात तात्पुरत्या स्वरुपात जप्तीचे आदेश जारी करण्यात आले आहेत. मागच्या महिन्यात उद्योगपती अनिल अंबानी यांच्या मुंबईतील ‘Abode’ निवासस्थानावर ईडीकडून तात्पुरती जप्तीची कारवाई करण्यात आली. जप्त करण्यात आलेल्या अनिल अंबानी यांच्या या घराची किंमत अंदाजे 3,716 कोटी रुपये एवढी आहे. ईडीने दिलेल्या माहितीनुसार अनिल अंबानी आणि त्याच्या उद्योग समूहातील कंपन्यांविरोधात आतापर्यंत एकूण 15000 कोटींपेक्षा जास्तची जप्तीची कारवाई करण्यात आली आहे.
चौकशीचा ससेमिरा
यापूर्वी अनिल अंबानी यांची ऑगस्ट 2025 मध्ये चौकशी करण्यात आली होती. त्यावेळी पीएमएलए अंतर्गत त्यांचा जबाव नोंदवण्यात आला होता. मालमत्ता सक्तवसुली संचालनालयाकडून यापूर्वी रिलायन्स कम्युनिकेशन, रिलायन्स कमर्शिअल फायनान्स, रिलायन्स होम फायनान्स या कंपन्यांतील घोटाळ्याप्रकरणी कारवाई करण्यात आली होती. त्यानुसार या संस्थांच्या 8 हजार 997 कोटींच्या मालमत्तांवर टाच आणण्यात आली होती. अनिल अंबानी यांच्या समूहातील कंपन्यांमागे अनेक दिवसांपासून चौकशीचा ससेमिरा लागला आहे.
