Gold Silver Rate Today : सोन्यात घसरण, चांदी पण आपटली, खरेदीची मोठी संधी

नवी दिल्ली | 6 सप्टेंबर 2023 : या महिन्याच्या सुरुवातीच्या दोन दिवसांत सोन्याने चांगली आघाडी घेतली. पहिल्या दिवशी सोने घसरले होते. त्यानंतर सोने उसळी घेईल असे वाटत असतानाच पाचव्या दिवशी सोन्याने माघार घेतली. सोन्याच्या किंमतीत घसरण झाली. चांदीला या महिन्यात मोठा पल्ला गाठता आलेला नाही. 16 ऑगस्टनंतर चांदीने मोठी भरारी घेतली होती. चांदीत जवळपास 4000 रुपयांची वाढ नोंदविण्यात आली होती. त्यानंतर चांदीत सातत्याने घसरण सुरु आहे. आता तर चांदीच्या किंमतीत मोठी घसरण झाली आहे. सोने-चांदीतील (Gold-Silver Price Today 6 September 2023) घसरणीचा फायदा ग्राहकांना होणार आहे. त्यांना स्वस्तात खरेदीची संधी चालून आली आहे.

सोन्याला ब्रेक

गुडरिटर्न्सनुसार, ऑगस्ट महिन्याच्या शेवटच्या सत्रात सोने 600 रुपयांनी वधारले होते. सप्टेंबर महिन्यात तेजीचे सत्र सुरु होते. 1 सप्टेंबरला भाव घसरले. तर 2 सप्टेंबरला 150 रुपयांची वाढ झाली. 3 तारखेला भावात बदल झाला नाही. 4 सप्टेंबर रोजी भाव 100 रुपयांनी वधारले. पण 5 सप्टेंबर रोजी किंमतींना ब्रेक लागला. सोने 150 रुपयांनी घसरले. 22 कॅरेट सोने 55,300 रुपये प्रति 10 ग्रॅम तर 24 कॅरेट सोन्याचा भाव 60,3100 रुपये प्रति 10 ग्रॅम असा होता.

चांदीत आपटी बार

सप्टेंबर महिन्यात चांदीला सूर सापडला नाही. पहिल्या आठवड्यात चांदीची दमछाक झाली आहे. भावात मोठी घसरण झाली आहे. 1 सप्टेंबर रोजी चांदीत 500 रुपयांची तर 2 सप्टेंबर रोजी चांदीत 200 रुपयांची घसरण झाली. 4 सप्टेंबर रोजी चांदीत किलोमागे 700 रुपयांची घसरण झाली. घसरणीचे हे सत्र पाचव्या दिवशी कायम होते. 5 सप्टेंबर रोजी चांदीत 1000 रुपयांची घसरण झाली. गुडरिटर्न्सनुसार, सध्या एक किलो चांदीचा भाव 75,200 रुपये आहे.

14 ते 24 कॅरेट सोन्याचा भाव

24 कॅरेट सोने 59,356 रुपये, 23 कॅरेट 59,118 रुपये, 22 कॅरेट सोने 54,370 रुपये, 18 कॅरेट 44517 रुपये, 14 कॅरेट सोने 34,723 रुपये प्रति 10 ग्रॅमवर पोहचले. चांदीचा भाव 72,231 रुपये होता. इंडियन बुलियन्स अँड ज्वेलर्स असोसिएशनने हा भाव जाहीर केला आहे. वायदे बाजारात आणि आंतरराष्ट्रीय बाजारात सोने आणि चांदीवर कुठलाही कर, शुल्क नसते. तर सराफा बाजारात शुल्क आणि कराचा समावेश होत असल्याने भावात तफावत दिसून येते.

BIS Care APP

सोनार तुम्हाला गंडवत असल्याची शंका असल्यास, अथवा तुम्हाला सोन्याची शुद्धता तपासायची असल्यास तुमच्या मोबाईलमध्ये BIS Care APP डाऊनलोड करा. प्ले स्टोअरमध्ये जाऊन तुम्ही हे बीआयएस ॲप घेऊ शकता. तुम्ही खरेदी केलेल्या सोन्यावर त्याचा हॉलमार्क क्रमांक (HUID) अंकित असतो. हा क्रमांक टाकल्यास हॉलमार्किंगची संपूर्ण माहिती समोर येईल आणि सर्वात शेवटी हे सोने किती कॅरेटचे आहे ते समोर येईल.