गॅस सिलिंडरबाबत सर्वात मोठी अपडेट; युद्धामुळे दिल्ली ते गल्ली होरपळली, थेट आकडे आले समोर!

इराण आणि अमेरिका यांच्यातील युद्धामुळे भारतातील इंधन पुरवठ्यावर परिणाम झाला आहे. समोर आलेल्या आकडेवारीनुसार मार्चमध्ये भारतातील LPG च्या वापरात 13 टक्क्यांची मोठी घट झाली. मध्य पूर्वेतील तणावामुळे पुरवठ्यात अडथळे निर्माण झाले, ज्याचा परिणाम घरगुती स्वयंपाक तसेच व्यावसायिक गॅसच्या उपलब्धतेवर झाला. मार्चमध्ये LPG चा वापर 2.379 दशलक्ष टन इतका राहिला, जो गेल्या वर्षी याच कालावधीत 2.729 दशलक्ष टन होता. म्हणजेच गॅसच्या वापरात 12.8 टक्के घट झाली आहे.

LPG पुरवठ्यात घट

भारत आपल्या एकूण वापराच्या 60 टक्के गॅस आयात करतो, यातील बहुतांशी भाग मध्य पूर्वेतून येतो. या युद्धामुळे होर्मुझ मार्ग बंद होता, त्यामुळे सौदी अरेबिया आणि संयुक्त अरब अमिरातीकडून होणाऱ्या पुरवठ्यात अडथळे आल्यामुळे सरकारने हॉटेल्ससारख्या व्यावसायिक संस्थांना आणि उद्योगांना दिल्या जाणाऱ्या LPG पुरवठ्यात कपात करून घरगुती वापरासाठी लागणारा गॅस पुरवठा वाढवला होता. मात्र तरीही गॅसच्या विक्रीत कपात झाली आहे.

LPG विक्रीत घट

पेट्रोलियम प्लॅनिंग अँड अ‍ॅनालिसिस सेल (PPAC) च्या माहितीनुसार, मार्चमध्ये घरगुती ग्राहकांना विकल्या गेलेल्या LPG सिलिंडरमध्ये 8.1 टक्क्यांची घट होऊन ती 2.219 दशलक्ष टन इतकी राहिली. तर गैर-घरगुती वापरकर्त्यांना विक्रीत सुमारे 48 टक्क्यांची घट झाली. PPAC च्या आकडेवारीनुसार विक्री कमी झाली असली तरी सरकारने पुरवठा सामान्य आहे आणि घरगुती मागणी पूर्ण केली जात आहे असा दावा केला. गॅसची कमतरता भरून काढण्यासाठी सरकारने रिफायनरीजना पेट्रोकेमिकल उत्पादनासाठी वापरल्या जाणाऱ्या फीडस्टॉकला LPG उत्पादनाकडे वळवण्याचे निर्देश दिले होते. यामुळे मार्चमध्ये घरगुती LPG उत्पादन वाढून 1.4 दशलक्ष टन झाले, जे एक वर्षापूर्वी 1.1 दशलक्ष टन होते.

पेट्रोल आणि डिझेल विक्रीत वाढ

LPG च्या विक्रीत कपात झाली असली तरी पेट्रोल आणि डिझेल विक्रीत चांगली वाढ दिसून आली. पेट्रोल विक्री 7.6 टक्क्यांनी वाढून 3.78 दशलक्ष टन झाली, तर डिझेल विक्री 8.1 टक्क्यांनी वाढून 8.727 दशलक्ष टन झाली. संपूर्ण आर्थिक वर्षासाठी ATF विक्री 2 टक्क्यांनी वाढून 9.161 दशलक्ष टन झाली, तर पेट्रोलची विक्री 6.5 टक्क्यांनी वाढून 42.586 दशलक्ष टन झाली.