शेअर बाजारात पडझड, तेजीच्या तुफानाला लागला ब्रेक

नवी दिल्ली | 7 डिसेंबर 2023 : भारतीय शेअर बाजाराने सलग 7 व्यापारी सत्रात मोठी झेप घेतली. बीएसई आणि एनएसईचा वारु उधळला. गुरुवारी या वारुला लगाम लागला. गुरुवारी सेन्सेक्स आणि निफ्टीने लाल निशाणी फडकवली. सुरुवातीच्या व्यापारी सत्रात सेन्सेक्स 262 अंकांच्या घसरणीसह 69,391 अंकावर ट्रेड करत आहे. तर निफ्टीत 70 अंकांची पडझड झाली आहे. ऑनलाई पेमेंट प्लॅटफॉर्म पेटीएमला त्याचा फटका बसला. या शेअरला 20 टक्क्यांचे लोअर सर्किट लागले. तर अदानी पोर्ट्स आणि अदानी एंटरप्राईजेसने निफ्टीत आघाडी घेतली आहे.

निवडणुकीनंतर घौडदौड

गेल्या तीन दिवसांपासून शेअर बाजाराचे वारु उधळले होते. बाजारात तुफान तेजीचे सत्र होते. सेन्सेक्स आणि निफ्टीने प्रत्येक दिवशी नवीन विक्रम केला. निवडणूक निकालानंतर शेअर बाजारात तुफान तेजी आली. सोमवारी सेन्सेक्स 1300 अंकांनी वधारला. तर निफ्टीने रॉकेट भरारी घेतली. निफ्टी 21000 अंकांवर पोहचला. पण गुरुवारी ही रॅली टिकली नाही. बाजार उघडताच पडझडीला सुरुवात झाली. बातमी लिहेपर्यंत सेन्सेक्समध्ये 0.38 टक्क्यांची घसरण होऊन तो 69, 383 अंकांच्या घरात होता. तर निफ्टीत 0.32 टक्क्यांची घसरण झाली होती. निफ्टी 20,872 अंकावर होता.

पेटीएमला फटका

या पडझडीचा मोठा फटका पेटीएमला बसला. बाजार उघडताच पेटीएमच्या शेअरला 20 टक्क्यांचे लोअर सर्किट लागले. निफ्टी 50 मध्ये ओएनजीसीचे शेअर 2.57 टक्क्यांनी घसरले. हिंदुस्थान युनिलिव्हरचा शेअर 2.24 टक्के घसरला. भारती एअरटेल, अपोलो हॉस्पिटल, बजाज फायनान्सच्या स्टॉकने गुंतवणूकदारांची निराशा केली. तर अदानी पोर्ट्स आणि अदानी एंटरप्राईजेसने निफ्टीत आघाडी घेतली आहे. अल्ट्राटेक सिमेंट, पॉवरग्रिड, एशियन पेंट्स, मारुती, टेक महिंद्रा आणि एचसीएलने हिरवे निशाण फडकावल्याने गुंतवणूकदारांना दिलासा मिळाला.

निफ्टी 21000 अंकावर जाणार?

सलग सात व्यापारी सत्रात बाजाराने मोठी घौडदौड केली. निफ्टीने सर्वकालीन उच्चांक 20,961.95 तर सेन्सेक्सने ऑलटाईम हाय 69,744.62 गाठला आहे. भारतीय शेअर बाजाराने सलग तेजीचे सत्र आरंभले. या आठवड्यात निफ्टी 21000 अंकांचा पल्ला गाठण्याची शक्यता वर्तविण्यात येत आहे. गुंतवणूकदार आणि ट्रेडर्स फायद्याचे गणित आजमावत असल्याने बाजार एका बाजूला झुकला आहे. पण तज्ज्ञांना अजूनही निफ्टी 21000 अंकावर जाण्याचा अंदाज आहे.