Rupee: रुपया धूमधडाम, दिवाळीपूर्वी पुन्हा आपटी बॉम्ब..

नवी दिल्ली : डॉलरच्या (Dollar) तुलनेत भारतीय रुपया (Rupee) कधी मजबूत होईल हे केंद्रीय अर्थमंत्र्यांनी सांगितले नाही. पण रुपयाने घसरणीचा आणखी एक विक्रम केला आहे. रुपया डॉलरच्या तुलनेत घसरुण आता थेट 83 रुपये झाला आहे. तीन दिवसांपूर्वीच रुपया डॉलरच्या तुलनेत 82.32 रुपये होता. त्यापूर्वी तो 82.24 रुपयावर बंद झाला होता. पण त्याचा घसरणीला काही केल्या ब्रेक लागत नसल्याचे समोर आले आहे.

डॉलरपेक्षा रुपया सातत्याने घसरत असल्याबाबत केंद्रीय अर्थमंत्री निर्मला सीतारमण यांनी अजब उत्तर दिले होते. रुपया कधी सावरेल याविषयी त्यांनी भाकित केले नव्हते, तर डॉलरविषयीचा आत्मविश्वास त्यांनी व्यक्त केला होता. त्यावर भारतीय जनमाणसातून संमिश्र प्रतिक्रिया उमटल्या होत्या. विरोधकांनी त्यांच्यावर तिखट हल्लाबोल केला होता.

अर्थमंत्र्यांनी रुपयाची घसरण होत नसून, डॉलर मजबूत होत असल्याचा दावा केला होता. तसेच इतर देशांच्या मानाने देशाचे चलन मजबूत असल्याचे म्हणणे त्यांनी मांडले होते. पण चीनच्या तुलनेत भारतीय रुपयांची खालावली स्थितीविषयी कोणीही मत मांडले नाही.

संसदेच्या अधिवेशनात केंद्रीय अर्थमंत्रालयाने रुपयाच्या घसरणीचा इतिहास दिला आहे. त्यानुसार, 2014 मध्ये डॉलरच्या तुलनेत भारतीय रुपया 63.33 रुपये होता. 2019 मध्ये रुपया 70 रुपयांपर्यंत घसरला.

30 जून 2022 रोजी एका डॉलरची किंमत 78.94 रुपया झाली. तर 11 जुलै 2022 रोजी पुन्हा रुपयात घसरण झाली. डॉलरच्या तुलनेत रुपया 79.41 झाला. या घसरणीला ब्रेक लावण्यात केंद्र सरकारला सपशेल अपयश आले.

16 ऑक्टोबर 2022 रोजीपर्यंत एक डॉलरची किंमत 82 रुपये 32 पैसे इतकी झाली. त्यानंतर लगेचच तिसऱ्या दिवशी म्हणजे 18 ऑक्टोबर रोजी डॉलरच्या तुलनेत रुपया थेट 83 इतका घसरला. रुपयाचा घसरणीचा विक्रम सुरुच आहे.

22 जून ते 18 ऑक्टोबर दरम्यान रुपयापेक्षा डॉलर अधिक मजबूत होत असल्याचे दिसून येते. 22 जून रोजी रुपया डॉलरच्या तुलनेत 78.39 इतका होता. 12 जुलै रोजी तो 79.65 इतका झाला. तर 22 सप्टेंबर रोजी रुपया डॉलरच्या तुलनेत 80.79 इतका होता. आज तो थेट 83 रुपयांवर पोहचला आहे.