Gen Z साठी नोकरीची मोठी संधी, ढगांकडे बघत बसायचं अन् महिन्याला घेयचा 8.5 लाख रुपये पगार

नोकरी मिळवण्यासाठी तरुणाईमध्ये मोठी स्पर्धा असल्याचे चित्र जगभरात पाहायला मिळते. मात्र, चीनमध्ये सध्या एका अनोख्या नोकरीची चांगलीच चर्चा रंगली आहे. चीनच्या हेनान प्रांतातील प्रसिद्ध लाओजुन पर्वतावर ‘क्लाउड ऑब्झर्व्हर’ या पदासाठी भरती करण्यात आली होती. विशेष म्हणजे, या एका पदासाठी तब्बल 3600 जणांनी अर्ज केला होता.

नोकरीची निवड प्रक्रिया देखील तितकीच अनोखी होती. उमेदवारांना चीनच्या लोकप्रिय सोशल मीडिया प्लॅटफॉर्म Douyin वर ठरावीक हॅशटॅगसह स्वतःचा ओरिजिनल व्हिडिओ पोस्ट करण्यास सांगण्यात आले होते. ज्या उमेदवाराच्या व्हिडिओला सर्वाधिक लाइक्स, रीच आणि चांगली कंटेंट क्वालिटी मिळेल, त्याची या नोकरीसाठी निवड केली जाणार होती.

22 वर्षीय कंटेंट क्रिएटरची झाली निवड

या स्पर्धेत 22 वर्षीय कंटेंट क्रिएटर ली सिचेन याने बाजी मारली. सोशल मीडियावर तो ‘जिओ जाओ’ या नावाने ओळखला जातो. त्याने आपल्या आई-वडिलांसोबत रात्री लाओजुन पर्वतावर केलेल्या चढाईचा व्हिडिओ सोशल मीडियावर पोस्ट केला.

या व्हिडिओला काही दिवसांतच तब्बल 1 लाख 10 हजारांहून अधिक लाइक्स मिळाले. त्यामुळे ली सिचेनची 30 दिवसांच्या या अनोख्या नोकरीसाठी निवड झाली. 16 जुलैपासून त्याने समुद्रसपाटीपासून सुमारे 7217 फूट उंचीवर आपले काम सुरू केले.

नोकरी दिसते आरामाची, पण प्रत्यक्षात आहे खडतर!

पर्वतावर राहून ढगांचे निरीक्षण करणे आणि त्याचे व्हिडिओ बनवणे हे ऐकायला एखाद्या स्वप्नवत नोकरीसारखे वाटू शकते. मात्र, प्रत्यक्षात हे काम अत्यंत थकवणारे असल्याचे ली सिचेनने सांगितले आहे.

त्याच्या दिवसाची सुरुवात पहाटे 4 वाजून 50 मिनिटांनी होते. कॅमेरा घेऊन सूर्योदयापासून संध्याकाळपर्यंत त्याला पर्वतावरील ढग आणि निसर्गाचे चित्रीकरण करावे लागते. पाऊस असो किंवा कडक ऊन, दररोज किमान एक ओरिजिनल शॉर्ट व्हिडिओ सोशल मीडियावर पोस्ट करणे बंधनकारक आहे.

विशेष दृश्य टिपण्यासाठी कधी कधी त्याला तब्बल दोन तासांपर्यंत वाट पाहावी लागते. पर्वतावरील सतत बदलणारे तापमान, खराब मोबाईल नेटवर्क आणि एकटेपणा यामुळे हे काम आणखी आव्हानात्मक बनते. स्वतः ली सिचेनने हा अनुभव अत्यंत कठीण आणि काहीसा यातनादायक असल्याचे म्हटले आहे.