Kalyan Theft : कल्याण डोंबिवलीत चोरांचा सुळसुळाट, एकाच दिवशी तीन घरफोड्या, एकूण 4.36 लाखांचा ऐवज लंपास

कल्याण : कल्याण-डोंबिवलीत चोरांचा सुळसुळाट झाला असून, शनिवारी दिवसभरात घरफोडी (Robbery)चे तीन गुन्हे कल्याण-डोंबिवलीतील वेगवेगळ्या पोलिस ठाण्यात दाखल करण्यात आले आहेत. ही तीन घरे फोडून चोरट्यांनी 4 लाख 36 हजार 500 रूपये किंमतीचा ऐवज लंपास केला आहे. चोरी (Theft)च्या या घटनेमुळे नागरिकांमध्ये भीतीचे वातावरण असून, सुरक्षाव्यवस्थेचा प्रश्न ऐरणीवर आला आहे. कल्याण पश्चिमेतील एकाच सोसायटीतील दोन घरे चोरट्यांनी फोडली. तर तिसरी घटना कल्याण-शीळ मार्गावरील सोनारपाडा गावात घडली आहे. दिवसाढवळ्या चोरांनी सोसायटीत (Society) घुसखोरी करुन घरफोड्या केल्याने खळबळ उडाली आहे. पोलीस चोरट्यांचा शोध घेत आहेत.

कल्याण पश्चिमेत एकाच सोसायटीतील दोन घरे फोडली

पहिली घटना कल्याण पश्चिमेकडील संपदा हॉस्पीटलजवळ असलेल्या विघ्नहर सोसायटीत घडली आहे. या इमारतीत ॲड. राठोड हे तळमजल्यावर राहतात. शनिवारी सकाळी 11 ते सायंकाळी 6 वाजण्याच्या दरम्यान ॲड. राठोड घर फोडून चोरट्यांनी 2 लाख 85 हजार रूपये किंमतीचा ऐवज लंपास केला. तर त्याच सोसायटीच्या तिसऱ्या मजल्यावर राहणाऱ्या अभय सिंग यांचे घर फोडून चोरांनी 95 हजार 500 रूपये किंमतीचा ऐवज लांबविला. या दोन्ही घरांच्या दरवाज्यांना असलेले कडी-कोयंडे तोडून चोरट्यांनी घरातील मौल्यवान सोन्या-चांदीचे दागिने व रोख रक्कम असा एकूण 3 लाख 70 हजार 500 रुपयांचा ऐवज लंपास केला. या प्रकरणी सपोनि देविदास ढोले अधिक तपास करत आहेत.

तिसरी घटना डोंबिवलीत कल्याण-शीळ मार्गावर घडली

तर तिसरी घटना डोंबिवलीतील कल्याण-शिळ मार्गावर असलेल्या सोनारपाडा गावातील शंकरनगरामध्ये शांताराम सदन नामक इमारतीत राहणारे गोविंद धोंडू उनवरकर यांच्या तक्रारीनुसार मनपाडा पोलिसांनी अज्ञात चोरट्यांच्या विरोधात गुन्हा दाखल केला आहे शनिवारी मध्यरात्री पहाटे दोन ते सकाळी आठच्या दरम्यान चोरट्यांनी कडी-कोंडा तोडून या घरातून 66 हजार रुपये किमतीचे सोन्याचे दागिने लंपास केले. सकाळी हा प्रकार उघडकीस आल्यानंतर उनवरकर यांनी ही तक्रार दाखल केली. याप्रकरणी सपोनि अनिल भिसे अधिक तपास करत आहेत. (4.36 lakhs was stolen by burglarizing three houses on the same day in Kalyan Dombivli)