Ulhasnagar Accident : बहिणीला कॉलेजला सोडून दुचाकीवरुन घरी परतत होता तरुण, अचानक समोर टँकर आला अन्…

उल्हासनगर : बहिणीला कॉलेजला सोडून घरी परतत असलेल्या तरुणासमोर अचानक टँकर आल्याने दुचाकी धडकल्याची थरारक घटना उल्हासनगरमधील कॅम्प 3 मध्ये घडली आहे. मात्र दैव बलवत्तर म्हणून तरुण या अपघातात सुखरुप बचावला आहे. अपघाताचा हा थरार सीसीटीव्ही कॅमेऱ्यात कैद झाला आहे. उल्हासनगरमधील वेदांता कॉलेजजवळ ही थरारक घटना घडली. अपघातात तरुण विरुद्ध दिशेला पडल्याने बचावला आहे. अपघाताची घटना पाहून काळजात धस्स झाल्याशिवाय राहणार नाही. घटनेनंतर टँकर चालक गाडी घेऊन निघून गेला.

बहिणीला कॉलेजमध्ये सोडून घरी परतत होता

उल्हासनगरच्या कॅम्प तीन मधील वेदांता कॉलेजमध्ये आपल्या बहिणीला सोडण्यासाठी एक तरुण दुचाकीवर आला होता. बहिणीला कॉलेजमध्ये सोडून तरुणाने घरी परतण्यासाठी दुचाकी सुरु केली आणि मागे वळत होता.

अपघाताचा थरार सीसीटीव्हीत कैद

तितक्यात अचानक मागून भरधाव टँकर आला अन् दुचाकीला धडकला. या धडकेत तरुण विरुद्ध दिशेला पडला तर दुचाकी टँकरच्या चाकाखाली आली. तरुणाला यात फारशी इजा झाली नाही. केवळ दैव बलवत्तर म्हणून तरुणाचा जीव वाचला. ही सर्व घटना कॉलेजच्या बाहेरील सीसीटीव्हीत कैद झाली आहे.