Ajit Pawar: अजितदादांचा अपघात नसून घातपात, निष्पक्ष चौकशी न झाल्यास मंत्रालयात आत्मदहन, राष्ट्रवादी पदाधिकाऱ्यांच्या इशाऱ्याने मोठी खळबळ

श्रीराम क्षीरसागर/ प्रतिनिधी: दिवंगत अजित पवार यांचा बारामती विमानतळावर विमान अपघातात(Ajit Pawar Plane Crash) मृत्यू झाला. या मृत्यूनंतर तो घातपात असल्याचा सशंय अनेक जण व्यक्त करत आहेत. त्यात आमदार रोहित पवार यांनी तर या मुद्दावरून रान पेटवलं आहे. चार पत्रकार परिषदेत त्यांनी सादरीकरण करत वैमानिकाच्या माध्यमातून अपघात घडवल्याचा गंभीर आरोप केला आहे. त्यांनी VSR कंपनी आणि मालक व्ही. के. सिंग यांच्याविरोधात आरोपांची राळ उडवून दिली आहे. याप्रकरणी निष्पक्ष चौकशी व्हावी यासाठी ते देशातील बड्या नेत्यांनाही भेटले.एअरक्राफ्ट ॲक्सिडेंट इन्व्हेस्टिगेशन ब्युरो (AAIB) आणि सीआयडी यांच्या तपासावर ही त्यांनी प्रश्नचिन्ह उपस्थित केले आहे. दरम्यान अजितदादा यांच्या राष्ट्रवादीतील काही नेते आणि पदाधिकारी सुद्धा या विमान अपघाताने अस्वस्थ आहेत. ज्याप्रकारे तपास सुरू आहे. तपासाची गती यावर त्यांनी तोंडसुख घेतले आहे. निष्पक्ष आणि योग्य तपासासाठी आता पदाधिकाऱ्यांनी आमरण उपोषण सुरू केले आहे. त्यासोबतच आत्मदहनाचा इशारा दिल्याने खळबळ उडाली आहे.

राष्ट्रवादीच्या पदाधिकार्‍यांचे अमरण उपोषण

दिवंगत उपमुख्यमंत्री अजित पावर यांच्या अपघात प्रकरणाची सखोल चौकशी करण्याची मागणी करत धाराशिवमध्ये राष्ट्रवादीच्या पदाधिकार्‍यांचे आमरण उपोषण सुरू आहे. राष्ट्रवादी काँग्रेस (अजित पवार ) पक्षाचे पदाधिकारी मोहन मुंडे यांनी हा अपघात नसून घातपात असल्याचा गंभीर आरोप केला आहे. या मागणीसाठी ते धाराशिव जिल्हाधिकारी कार्यालयासमोर गेल्या दोन दिवसांपासून उपोषण करत आहेत. मोहन मुंडे यांनी प्रशासनाकडे काही प्रमुख मागण्या केल्या आहेत. त्यांनी तपासाववर प्रश्नचिन्ह उपस्थित केले आहे.

तर मंत्रालयामध्ये आत्मदहन करणार

मोहन मुंडे यांनी प्रशासनाकडे काही मागण्या केल्या आहेत. त्यांनी तपासावर प्रश्नचिन्ह उपस्थित केले आहे. अपघाताच्या पूर्वी अजित पवार विमानतळावर पोहोचल्याचे CCTV फुटेज सार्वजनिक करावे. या प्रकरणी दोषींवर एफआयआर दाखल करावा. अपघाताची स्वतंत्र व निष्पक्ष चौकशी करावी अशा मागण्या उपोषणकर्ते मोहन मुंडे यांनी केल्या आहेत. दरम्यान, या मागण्या मान्य न झाल्यास 1 मे रोजी मुंबई येथे मंत्रालयात आत्मदहन करण्याचा इशारा मोहन मुंडे यांनी दिला आहे.

कार्यकर्त्यांत मोठी धुसफूस?

शरद पवार राष्ट्रवादी काँग्रेसचे आमदार रोहित पवार याप्रकरणी सातत्याने प्रश्न विचारत आहेत. त्यांनी याप्रकरणी चार पत्रकार परिषद घेत तपास आणि यंत्रणांवरील दबाव यावर गंभीर आरोप केले आहेत. तर अजितदादांच्या राष्ट्रवादीतील काही आमदारही याप्रकरणी तपासावर नाखूष असल्याचे समोर आले आहेत. याप्रकरणी काही नेत्यांचे मौन अनेकांना खटकत आहेत. तर दादांच्या राष्ट्रवादीचे पदाधिकारी आणि कार्यकर्त्यांमध्ये वरिष्ठ नेत्यांच्या भूमिकेने नाराजी असल्याचे दिसून येत आहे. त्यांनी उपोषणाचा मार्ग निवडला आहे. तर आत्मदहनाचाही इशारा दिला आहे.