Jalgaon Man Death : थंडीपासून बचाव करण्यासाठी शेकोटी पेटवली होती, शेक घेताना तोल गेला अन्…

जळगाव : सध्या थंडीने देशभरात कहर माजवला आहे. या थंडीपासून बचाव करण्यासाठी ग्रामीण भागातील लोक शेकोटीचा आधार घेतात. मात्र हीच शेकोटी एका इसमाच्या जीवावर बेतली आहे. शेकोटीजवळ शेक घेण्यासाठी गेलेल्या इसमाचा तोल गेल्याने तो शेकोटीत पडला. यात गंभीर भाजल्याने त्याचा दुर्दैवी मृत्यू झाल्याची घटना जळगावमध्ये उघडकीस आली आहे. ईश्वर अहिरे असे मृत्यू झालेल्या इसमाचे नाव आहे. याप्रकरणी एमआयडीसी पोलीस ठाण्यात मृत्यूची नोंद करण्यात आली असून, पोलीस अधिक तपास करत आहेत.

एमआयडीसी परिसरात बंद कंपनीजवळ घडली घटना

जळगावमध्ये एमआयडीसी परिसरात एका बंद पडलेल्या कंपनी बाहेर थंडीमुळे पेटवलेल्या शेकोटीत तोल जाऊन भाजल्यामुळे एका इसमाचा मृत्यू झाल्याची धक्कादायक घटना समोर आली असून ईश्वर अहिरे असे मृत इसमाचे नाव आहे.

शेकोटीत तोल जाऊन पडल्याने मृत्यू

मयत ईश्वर अहिरे हा मद्यपान करत असून, थंडीमुळे सदर इसमाने शेकोटी पेटवली होती. मात्र त्यात त्याचा तोल जाऊन तो गंभीररित्या भाजला गेल्याने त्याचा मृत्यू झाल्याची माहिती पोलिसांनी दिली.

दरम्यान या प्रकरणी पोलीस अधिक तपास करत असून, घटनास्थळी अप्पर पोलीस अधीक्षक चंद्रकांत गवळी यांच्यासह एमआयडीसी पोलीस स्टेशनचे पोलीस निरीक्षक जयपाल हिरे दाखल झाले.