CCTV Video : ‘पाटलाच्या नादाला लागायचं नाही’ म्हणत केला कोयत्याने वार, घटनेचा थरार सीसीटीव्हीत कैद
आरोपींमध्ये माजी उपसरपंचाचा समावेश असल्याने एकच खळबळ उडाली आहे. जखमी तरुणाला उपचारासाठी बारामतीतील खाजगी रुग्णालयात दाखल करण्यात आले आहे.
बारामती : शिवनगर येथील श्री तुळजाभवानी मंदिरात एकावर कोयत्याने प्राणघातक हल्ला (Attack) केल्याची धक्कादायक घटना बारामतीत घडली आहे. पाटलाच्या नादाला लागायचं नाही, असे म्हणत कोयत्याने वार केला. महेश उत्तमराव पैठणकर (46 रा.पैठणकर वस्ती शिवनगर माळेगाव बु.) असे हल्ला करण्यात आलेल्या तरुणाचे नाव आहे. याप्रकरणी तिघांवर गुन्हा (Case) दाखल करण्यात आला आहे. हल्ल्याची घटना सीसीटीव्ही (CCTV) कॅमेऱ्यात कैद झाली आहे. आरोपींमध्ये माजी उपसरपंचाचा समावेश असल्याने एकच खळबळ उडाली आहे. जखमी तरुणाला उपचारासाठी बारामतीतील खाजगी रुग्णालयात दाखल करण्यात आले आहे. याप्रकरणी माळेगाव पोलीस ठाण्यात गुन्हा दाखल करण्यात आला आहे.
बारामती तालुक्यातील माळेगावमध्ये एकावर खूनी हल्ला, घटनेचा थरार सीसीटिव्हीत कैद#Baramati #Attack #OldDispute #CCTV pic.twitter.com/HIaP44YvGO
— TV9 Marathi (@TV9Marathi) July 11, 2022
आरोपींमध्ये माजी उपसरपंचाचा समावेश
माळेगाव पोलीस ठाण्याचे सहायक पोलीस निरीक्षक राहुल घुगे यांनी दिलेल्या माहितीनुसार, फिर्यादी महेश पैठणकर हा शिवनगर येथील श्री तुळजाभवानी मंदिरात 10 जुलै रोजी संध्याकाळी 7.30 वाजण्याच्या सुमारास उभा होता. यावेळी नितीन पाटील व सचिन पाटील यांच्या नादाला लागण्याच्या कारणावरून आरोपी स्वप्निल ऊर्फ पिल्या देऊळकर रा.शिवनगर माळेगाव याने महेशच्या डोक्यात आणि पाठीवर जीवे मारण्याच्या उद्देशाने कोयत्याने प्राणघातक हल्ला केला. मंदिरातील सीसीटीव्ही कॅमेऱ्यात ही घटना कैद झाली आहे. फिर्यादीने दिलेल्या तक्रारीवरून आरोपी स्वप्निल ऊर्फ पिल्या देऊळकर, नितीन वसंतराव तावरे पाटील, सचिन वसंतराव तावरे पाटील यांच्यावर विविध कलमासह गुन्हा दाखल करण्यात आला आहे. आरोपींमध्ये माजी उपसरपंच सचिन तावरे पाटील याचे नाव असल्याने एकच खळबळ उडाली आहे. दरम्यान जखमी महेश पैठणकर यांच्यावर बारामतीत खाजगी दवाखान्यात उपचार सुरू आहेत. सदर घटनेचा तपास सहायक पोलीस निरीक्षक राहुल घुगे हे करीत आहेत. (A young man was attacked with a scythe in a temple in Baramati)
