दाढी करायला तो घरी परतलाच नाही, पत्नीने फोन केला, मग फोनवर बोलता बोलता जे घडले ते भयंकर

अमरावती : अमरावतीत एक हादरवून टाकणारी घटना उघडकीस आली आहे. दाढी करायला गेलेल्या तरुणावर जीवघेणा हल्ला झाल्याची घटना बडनेरा येथे घडली आहे. या हल्ल्यात तरुणाचा जागीच मृत्यू झाला. या घटनेमुळे एकच खळबळ उडाली. तरुणाची थुंकी पायावर उडाली म्हणून त्याच्यावर हल्ला करत त्याची हत्या करण्यात आली. याप्रकरणी बडनेरा पोलीस ठाण्यात हत्येचा गुन्हा दाखल करण्यात आला आहे. पोलिसांनी आरोपीला अटक केली आहे. राहुल जनार्दन वसुकर असे मयत तरुणाचे नाव आहे, तर सिद्धांत उमेश डोंगरे असे आरोपीचे नाव आहे. आरोपीने पोलीस चौकशीत गुन्ह्याची कबुली दिली आहे.

थुंकी पायावर उडाल्याने वाद

मयत राहुल हा सोमवारी दुपारी दाढी करायला घरातून गेला. मात्र बराच वेळ होऊन गेला तरी तो घरी परतला नाही. म्हणून पत्नीने त्याला फोन केला. पत्नीसोबत फोनवर बोलतच तो मिलचाळ परिसरातून चालत घरी येत होता. यावेळी सिद्धांत डोंगरे हा देखील त्याच्या विरुद्ध दिशेने येत होता. यादरम्यान राहुल थुंकला असता त्याची थुंकी सिद्धांतच्या पायावर उडाली. यावरुन दोघांमध्ये बाचाबाची सुरु झाली. बघता बघता हा वाद विकोपाला गेला आणि आरोपीने लोखंडी पाईपने राहुलला मारहाण करण्यास सुरवात केली. यात राहुल गंभीर जखमी झाला.

आरोपी अटक

राहुलची पत्नी तेथे पोहचली. पोलिसांना घटनेची माहिती देण्यात आली. पोलिसांनी घटनास्थळी दाखल होत जखमी राहुलला उपचारासाठी रुग्णालयात नेले. मात्र डॉक्टरांनी त्याला मृत घोषित केले. पोलिसांनी आरोपीला अटक करत पुढील तपास सुरु केला आहे. हत्येमागे केवळ थुंकीचंच कारण आहे की आणखी काही जुना वाद आहे, याबाबत पोलीस सखोल तपास करत आहेत.