नर्सिंगला प्रवेश मिळवून देतो सांगत विद्यार्थिनींची फसवणूक, दोघा भावांना पोलिसांनी ठोकल्या बेड्या
सध्या सर्वत्र महाविद्यालयीन प्रवेश प्रक्रिया सुरु आहे. यामुळे प्रवेशाच्या नावाखाली फसवणुकीचे प्रकार वाढले आहेत. अशीच एक घटना नागपूरमध्ये घडली आहे.
नागपूर : नर्सिंगला प्रवेश मिळवून देण्याच्या बहाण्याने विद्यार्थिनींची फसवणूक करणाऱ्या दोघा भावांना नागपूरच्या पाचपावली पोलिसांनी अटक केली आहे. आरोपी भावांनी अनेक मुलींची फसवणूक केल्याची माहिती मिळते. याप्रकरणी पोलिसांनी फसवणूक झालेल्या मुलींना पुढे येऊन तक्रार देण्याचं आवाहन केलं आहे. सुचित वालदे आणि संदेश वालदे अशी दोघा भावांची नावे आहेत. आरोपींकडून 1 लाख 60 हजाराची रक्कमही पोलिसांनी जप्त केली आहे. अशा प्रकारे फसवणूक करणाऱ्यांपासून विद्यार्थ्यांनी सावध राहण्याची गरज आहे.
पैसे घेतले मात्र प्रवेश दिला नाही
नागपुरात नर्सिंगला प्रवेश मिळवून देण्यासाठी सूचित आणि संदेश वालदे या दोघा भावांनी चार ते पाच मुलींकडून पैसे घेतले होते. मात्र मुलींचे अॅडमिशन झालेच नाही. यानंतर या मुलींनी त्यांच्याकडे पैसे परत मागितले, मात्र आरोपींनी पैसे देण्यास नकार दिला. चार ते पाच मुलींनी याची तक्रार पाचपावली पोलिसात दिली. तक्रार प्राप्त झाल्यानंतर पोलिसांनी ठिकठिकाणी त्यांचा शोध सुरु केला.
तांत्रिक तपास आणि गुप्त माहितीच्या आधारे पोलिसांनी आरोपींच्या मुसक्या आवळल्या. पोलीस तपासात आरोपींनी याआधीही अनेक मुलींना फसवल्याचं निष्पन्न झालं आहे. आरोपींकडून दीड लाखांची रोकडही जप्त केली आहे. याबाबत पोलीस पुढील तपास करत आहेत. सध्या महाविद्यालयीन प्रवेशाचा काळ असल्याने आणि विद्यार्थ्यांची प्रवेशासाठी मोठी चढाओढ सुरू आहे.
