मेव्हण्याचे लग्न जमवण्यासाठी चालले होते कुटुंब, मात्र घरापर्यंत पोहचलेच नाहीत; कुटुंबासोबत नेमके काय घडले?

शिरूर / सुनील थिगळे (प्रतिनिधी) : रस्त्याच्या कडेला उभ्या असलेल्या कंटेनरला कार धडकल्याने झालेल्या भीषण अपघातात एकाच कुटुंबातील चौघांचा जागीच मृत्यू झाला. पुणे नगर महामार्गावर कारेगाव लगत फलके मळा येथे ही दुर्दैवी घटना घडली. मृतांमध्ये चार वर्षांच्या चिमुकलीचा समावेश आहे. या अपघातात कार चालक गंभीर जखमी झाला असून, त्याच्यावर कारेगाव येथील खाजगी रुग्णालयात उपचार सुरु आहेत. अश्विन सुदाम भोंडवे असे अपघातात गंभीर जखमी झालेल्या चालकाचे नाव आहे. याप्रकरणी कंटेनर चालकाविरोधात गुन्हा दाखल करत त्याला अटक केली आहे. बबलू लहरी चौहान असे कंटेनर चालकाचे नाव आहे.

एकाच कुटुंबातील चौघांचा जागीच मृ्त्यू

सुदाम शंकर भोंडवे, सिंधुताई सुदाम भोंडवे, कार्तिकी अश्विन भोंडवे आणि आनंदी अश्वीन भोंडवे अशी अपघातात मृत झालेल्यांची नावे आहेत. सर्वजण बीड जिल्ह्यातील पाटोदा तालुक्यातील रहिवासी आहेत. अपघातात कार चालक गंभीर जखमी झाले आहेत. अश्विन सुदाम भोंडवे अपघातात जखमी झालेल्या व्यक्तीचे नाव आहे. त्यांच्यावर कारेगावमधील खासगी रुग्णालयात उपचार चालू आहेत.

मेव्हण्याचे लग्न जमवायला चालले होते

पोलिसांनी दिलेल्या माहितीनुसार, अश्विन भोंडवे यांच्या मेहुण्याला लग्नासाठी पाहुणे बघायला येणार असल्याने ते आपल्या कुटुंबासह आपल्या इंडिका कारने चाकण येथे चालले होते. फलके मळ्याजवळ पुण्याच्या दिशेने तोंड करून उभ्या असलेल्या कंटेनरवर त्यांची कार आदळली. या अपघातात अश्विन हे गंभीर जखमी झाले तर त्यांच्या कुटुंबाचा जागीच मृत्यू झाला.

पोलिसांनी तात्काळ बचावकार्य हाती घेत वाहतूक सुरळीत केली

अपघाताची माहिती मिळताच रांजणगाव एमआयडीसी पोलिसांनी घटनास्थळी धाव घेऊन क्रेनच्या साहाय्याने कंटेनरखाली घुसलेली कार बाहेर काढली. स्थानिक तरूणांच्या मदतीने जखमी आणि मृतांना बाहेर काढले. अपघातानंतर काहीवेळ या मार्गावरील वाहतूक विस्कळीत झाली होती. अपघातात मोटारीचा चक्काचूर झाला.