क्षुल्लक कारणातून घरात घुसून कुटुंबाला मारहाण, घटना सीसीटीव्हीत कैद

मुंबई : मुंबईतील चेंबूर परिसरात एक धक्कादायक घटना उघडकीस आली आहे. मोटारसायकलला धडक दिल्याच्या क्षुल्लक कारणावरुन घरात घुसून कुटुंबाला मारहाण आणि भांडण केल्याची घटना घडली आहे. ही संपूर्ण घटना सीसीटीव्हीत कैद झाली आहेत. हा व्हिडिओ सोशल मीडियावर व्हायरल झाला आहे. याप्रकरणी आरसीएफ पोलीस ठाण्यात तक्रार दाखल करण्यात आली आहे. चौघांविरोधात भादवी 452 ,427 ,323 ,504 ,506 आणि 34 कलमानुसार गुन्हा दाखल करून पोलीस तपास करत आहेत. पोलीस आरोपींचा शोध घेत आहेत.

काय आहे प्रकरण?

पीडित कुटुंब आणि आरोपी चेंबूरमधील विष्णुनगर परिसरात राहतात. एका आठवड्यापूर्वी पीडितांच्या मुलाने दुसऱ्या इमारतीत राहणाऱ्या एका तरुणाच्या मोटारसायकलला धडक झाली होती. त्यानंतर त्या मुलाने त्याच्या मित्रांना एकत्र केले आणि पीडित कुटुंबाच्या घरात घुसून मारहाण केली. सर्व घटना सीसीटीव्हीत कैद झाली आहे. पीडितांच्या घराबाहेर 20 ते 25 जण जमा झाले. त्यानंतर त्यांनी दरवाजा तोडून घरात प्रवेश केला आणि घरातील सदस्यांना मारहाण केल्याचे सीसीटीव्हीत कैद झाले आहे.

यानंतर पीडित कुटुंबाने आरसीएफ पोलीस ठाण्यात धाव घेत तक्रार दाखल केली. पीडित कुटुंबाच्या तक्रारीवरुन आरसीएफ पोलीस ठाण्यात चौघांविरोधात गुन्हा दाखल करण्यात आला आहे. पुढील कारवाई पोलीस करत आहेत.

जळगावमध्येही घरात घुसून कुटुंबाला मारहाण

घरात घुसून काही महिला आणि पुरुषांना जमावाकडून मारहाण केल्याची घटना समोर येत आहे. या तुंबळ हाणामारीचा व्हिडिओ सोशल मीडियावर व्हायरल करण्यात आला आहे. ही घटना जळगाव जिल्ह्यातील जामनेर तालुक्यातील असल्याचे समजते. मारहाण करणारे हे एकमेकांचे नातेवाईक असून, याप्रकरणी दोन्ही गटाने परस्परविरोधी फिर्याद दिल्याने संभाजीनगर जिल्ह्यातील सोयगाव पोलीस ठाण्यात परस्परविरोधी गुन्हे दाखल करण्यात आले आहेत.