मॅट्रीमोनियल साईटवर डॉक्टर असल्याची बतावणी केली, दोघांच्या भेटीगाठी सुरु झाल्या; मग नर्ससोबत जे घडले…

रायपूर : मॅट्रीमोनियल साईटवर एम्स रुग्णालयात डॉक्टर असल्याचे सांगत नर्सशी मैत्री केली. त्यानंतर लग्नाचे आमिष दाखवत दोन वर्षे बलात्कार केल्याची घटना छत्तीसगडमधील रायपूरमध्ये उघडकीस आली आहे. अभानपूर पोलीस ठाण्याच्या हद्दीत ही घटना घडली. आरोपी हा एका रुग्णालयात वॉर्डबॉयची नोकरी करतो. त्याने मॅट्रीमोनियल साईटवर डॉक्टर असल्याचे सांगत नर्ससोबत मैत्री केली. पीडितेच्या तक्रारीवरून पोलिसांनी गुन्हा दाखल करून आरोपीला अटक केली असून, या प्रकरणाचा तपास सुरू आहे. आरोपीने आणखी किती तरुणींची अशा प्रकारे फसवणूक केली याबाबत पोलीस चौकशी करत आहेत.

मॅट्रीमोनियल साईटवर आरोपीशी ओळख झाली

पीडित नर्स लग्नासाठी ऑनलाइन मॅट्रिमोनीयल साईटवर मुलगा शोधत होती. यादरम्यान तिची ओळख आरोपी निलेश मांडे याच्याशी झाली. मॅट्रीमोनियल साईटवर तरुणाने स्वतःला रायपूर एम्समधील एक मोठा डॉक्टर असल्याचे सांगितले होते. यानंतर दोघांमध्ये बोलणे सुरू झाले. हळू हळू दोघांच्या भेटीगाठी वाढत गेल्या. मग लग्नाचे आमिष दाखवत आरोपी पीडितेवर दोन वर्षे बलात्कार करत होता.

दोन वर्षानंतर आरोपी डॉक्टर नसून वॉर्डबॉय असल्याचे कळले

यादरम्यान त्याने दुसऱ्या मुलीशी साखरपुडाही केला. मात्र पीडितेला त्याच्यावर संशय येऊ लागल्याने तिने त्याची माहिती काढली, तेव्हा तिला कळले की आरोपी डॉक्टर नसून, वॉर्डबॉय आहे. यानंतर दोघांमध्ये जोरदार भांडण झाले. मग तरुणीने पोलीस ठाणे गाठत आरोपीविरोधात तक्रार दिली. पीडितेच्या तक्रारीवरुन पोलिसांनी आरोपीविरोधात गुन्हा दाखल करत त्याला अटक केली आहे. पोलीस आरोपीची अधिक चौकशी करत आहेत.