चिकन करीचा बेत होता पण खाता खाता झाला राडा, बाप थेट तुरुंगातच गेला; नेमकं काय घडलं?

मंगलोर : कर्नाटकातील दक्षिण कन्नड जिल्ह्यात एक हैराण करणारी घटना उघडकीस आली आहे. चिकन करी मिळाली नाही म्हणून बापाने मुलाला बेदम मारहाण केली. या मारहाणीत गंभीर जखमी मुलाचा जागीच मृत्यू झाला. घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेत शवविच्छेदनासाठी रुग्णालयात पाठवला. शिवराम असे मयत तरुणाचे नाव आहे. शिवरामच्या पश्चात पत्नी आणि दोन मुलं आहेत. शीना असे आरोपी बापाचे नाव आहे. दक्षिण कन्नड जिल्ह्यातील सुलिया तालुक्यातील गुट्टीगर येथे ही घटना घडली. घटनेनंतर परिसरात एकच खळबळ उडाली.

चिकन करी मिळाली नाही म्हणून संतापला

शीना याच्या घरी मंगळवारी चिकन करीचा बेत होता. यावेळी शीना बाहेर गेला होता. शीना घरी परत आला तेव्हा कुटुंबीयांनी चिकन करी संपवली होती. शीनाला चिकन करी शिल्ल्क राहिली नव्हती. यामुळे शीना संतापला. त्याने मुलगा शिवरामशी याबाबत वाद घालण्यास सुरुवात केली. हा वाद इतका विकोपाला गेली की, शीनाने शिवरामला लाडकी काठीने मारहाण करण्यास सुरुवात केली.

गंभीर जखमी मुलाचा जागीच मृत्यू

या मारहाणीत शिवराम गंभीर जखमी झाला आणि त्याचा जागीच मृत्यू झाला. घटनेची माहिती मिळताच स्थानिक पोलिसांनी घटनास्थळी धाव घेतली. घटनेचा पंचनामा करत मृतदेह ताब्यात घेतला. पोलिसांनी आरोपी बापाला अटक केली आहे. या घटनेमुळे गावात एकच खळबळ माजली आहे. पोलीस पुढील तपास करत आहेत. या घटनेमुळे दोन मुले आपल्या बापाच्या प्रेमाला पारखी झाली आहेत.