Nanded Rape | अल्पवयीन मुलीवर डॉक्टरचा वारंवार बलात्कार, पीडिता चार महिन्यांची गर्भवती
पीडितेच्या असहाय्यतेचा फायदा घेत, तिला वेगवेगळी आमिषं दाखवून डॉक्टरने अनेक वेळा तिच्यावर बलात्कार केल्याचा आरोप आहे. यातून ती चार महिन्यांची गर्भवती राहिली.
नांदेड : अल्पवयीन मुलीवर डॉक्टरने (Doctor) सातत्याने बलात्कार केल्याची धक्कादायक घटना उघडकीस आली आहे. नांदेड जिल्ह्यातील किनवट तालुक्यात (Nanded Crime News) हा प्रकार घडला. चौदा वर्षांच्या मुलीच्या असहाय्यतेचा फायदा घेत नराधम डॉक्टरने तिच्यावर वारंवार बलात्कार (Rape) केल्याचा आरोप आहे. पीडितेचा गर्भपात झाल्याने ही घटना काल उघडकीस आली.
काय आहे प्रकरण?
डॉक्टर विकास सुंकरवार असं नराधम डॉक्टरचं नाव आहे. अल्पवयीन असलेली पीडित मुलगी ही वर्षभरापासून किनवट येथील डॉ. विकास सुंकरवार यांच्याकडे साफसफाईच्या कामाला होती.
चार महिन्यांची गर्भवती
पीडितेच्या असहाय्यतेचा फायदा घेत, तिला वेगवेगळी आमिषं दाखवून डॉक्टरने अनेक वेळा तिच्यावर बलात्कार केल्याचा आरोप आहे. यातून ती चार महिन्यांची गर्भवती राहिली. पोट दुखत असल्याने तिला एका दवाखान्यात नेले असता बाथरुममध्येच तिचा गर्भपात झाल्याने बलात्काराची संपूर्ण घटना उघडकीस आली.
पीडितेचा इन कॅमेरा जबाब नोंदवून डॉ. सुंकरवार विरोधात किनवट पोलीस ठाण्यात बलात्कार आणि पॉस्को कायद्या अंतर्गत गुन्हा दाखल करुन अटक करण्यात आली आहे.
सुंकरवार याला न्यायालयाने 12 मे पर्यंत पोलीस कोठडी सुनावली आहे. डॉक्टर सुंकरवारच्या या कुकर्मामुळे नागरिकांत संताप व्यक्त केला जात आहे.
