Pune News: अतिक्रमणविरोधी कारवाईने नगरसेवक धास्तावले, व्यापारीही आक्रमक, पुण्यात काय घडतंय?
महापालिका आयुक्तांनी संपूर्ण पुणे शहरात अतिक्रमणविरोधी कारवाईचा धडाका लावला. या कारवाईमुळे महापालिकेतील अनेक नगरसेवकांच्या कार्यकर्त्यांचे मोठे नुकसान झाले आहे. ज्या कार्यकर्त्यांच्या दुकानांवर कारवाई झाली आहे, त्यांनी आता नगरसेवकांकडे तगादा लावला आहे.

दिपक कापरे, प्रतिनिधी: पुणे महापालिकेच्या अतिक्रमणविरोधी कारवाईमुळे आता नगरसेवकही धास्तावले असल्याचे चित्र पाहायला मिळत आहे. महापालिकेच्या जनरल बॉडी मिटिंगमध्ये अतिक्रमण कारवाई होत नसल्यामुळे नगरसेवकांनी आंदोलन करत आयुक्तांवर टीका केली होती. एवढेच नाही, तर शहरातील अतिक्रमणाला आयुक्त जबाबदार असून त्यांनाही सहआरोपी करण्याची मागणी करण्यात आली होती. त्यानंतर महापालिका आयुक्तांनी संपूर्ण पुणे शहरात अतिक्रमणविरोधी कारवाईचा धडाका लावला.
या कारवाईमुळे महापालिकेतील अनेक नगरसेवकांच्या कार्यकर्त्यांचे मोठे नुकसान झाले आहे. ज्या कार्यकर्त्यांच्या दुकानांवर कारवाई झाली आहे, त्यांनी आता नगरसेवकांकडे तगादा लावला आहे. त्यामुळे ही कारवाई कशी मागे घेता येईल, याची चर्चा सभागृहातील नगरसेवकांमध्ये सुरू असल्याचे दिसत आहे. याच मुद्द्यावरून बोलताना अरविंद शिंदे यांनी सभागृहात भाजपच्या नगरसेवकांची खिल्ली उडवली.
काय म्हणाले अरविंद शिंदे?
“पुणे शहरात अतिक्रमण कारवाई होणे गरजेचे होते. या मुद्द्यावरुन सत्ताधाऱ्यांमध्येंच फुट पडली आहे. कुणाचाही चेहरा न बघता…याचा माणूस की त्याचा माणूस हे न पाहता कारवाई करावी. आयुक्तांवर जो कोणी दबाव आणत असेल तर त्याला एक्सपोज केले आहे पुणे शहराची कॅपिसटी संपली आहे,” असे म्हणत काँग्रेस नगरसेवक अरविंद शिंदे यांनी भाजपवर निशाणा साधला.
व्यापारी आक्रमक, भरपाई देण्याची मागणी!
दुसरीकडे, लक्ष्मी रोडवरील अतिक्रमण कारवाईमध्ये आमची नुकसान भरपाई द्यावी अशी मागणी व्यापाऱ्यांनी केली आहे. उद्या महानगरपालिका अधिकाऱ्यांसोबत होतं असलेल्या बैठकीत भरपाई ही प्रमुख मागणी असणार आहे. पुण्यात लक्ष्मी रोडवरील सकाळपासून सुरू असलेली अतिक्रमणाविरोधी महानगरपालिकेची कारवाई आमच्यावर दडपशाही करून करण्यात आली अशा भावना व्यापाऱ्यांनी व्यक्त केल्या.
तसेच कोणतीही नोटीस न देता कारवाई केली, असा आरोपही करण्यात आला आहे. महानगरपालिकेच्या अधिकाऱ्यांना जागेची कागदपत्र दाखवण्याचा प्रयत्न केला परंतु त्यांनी कागदपत्र देखील पाहिले नाहीत, अतिक्रमणाला राजकीय वरदहस्त आहे का अशी देखील शंका व्यापाऱ्यांनी व्यक्त केली आहे, थोडक्यात आता अतिक्रमणाच्या धडक कारवाईने पुण्यामध्ये चांगलाच वादंग पाहायला मिळत आहे.
