Malad Murder : प्रेयसीचे दुसऱ्या पुरुषांशी अनैतिक संबंध, संतापलेल्या प्रियकराने तरुणीचा गळा चिरला

मुंबई : प्रेयसीच्या दुसऱ्या पुरुषांशी अनैतिक संबंध (Immoral Relation) असल्याचे कळल्यानंतर संतापलेल्या प्रियकरा (Boyfriend)ने तरुणीची गळा चिरुन हत्या (Murder) केल्याची घटना मालाडमध्ये बुधवारी मध्यरात्री घडली. मनिषा पृथ्वीपाल जयस्वार (27) असे मयत तरुणीचे नाव आहे. याप्रकरणी मयत तरुणीच्या मावसभावाच्या फिर्यादीवरुन कुरार पोलीस ठाण्यात हत्येचा गुन्हा नोंद करण्यात आला आहे. पोलिसांनी या प्रकरणाचा कसून तपास करत 12 तासात आरोपीला बेड्या ठोकल्या आहेत. अखिलेश कुमार प्यारेलाल गौतम (24) असे अटक करण्यात आलेल्या आरोपीचे नाव आहे. प्रेयसी घरी एकटी असताना अखिलेशने तिचा गळा चिरत डोक्यावर वार करत तिची हत्या केली. अखिलेश आणि मनिषाचे प्रेमसंबंध होते आणि दोघे लग्नही करणार होते. मध्यरात्री मनिषाचा मावस भाऊ घरी आल्यानंतर हत्येची घटना उघडकीस आली.

प्रेयसीच्या डोक्याला गंभीर जखमा; तीव्र रक्तस्रावामुळे मृत्यू

तरुणीच्या डोक्याला दोन गंभीर स्वरूपाच्या जखमा झाल्या होत्या. त्यामुळे प्रचंड रक्तस्राव झाला आणि त्यातच तरुणीला प्राण गमवावा लागला. कुरार पोलिसांनी आजूबाजूच्या परिसरात चौकशी केली परंतु कोणताही भक्कम पुरावा हाती लागू शकला नव्हता. त्यानंतर फोन रेकॉर्डचे विश्लेषण केल्यानंतर पोलिसांनी तिचा प्रियकर अखिलेश कुमार गौतम याचा शोध घेण्यास सुरुवात केली. त्यावेळी तो गुन्हा नोंद झाल्यापासून बेपत्ता असल्याचे पोलिसांच्या निदर्शनास आले. पोलिसांना गुरुवारी मानखुर्द रेल्वे स्थानकावर गौतम सापडला. चौकशीनंतर गौतमनेच तरुणीचा खून केल्याचे निष्पन्न झाले. त्यानुसार त्याच्यावर भादंवि कलम 302 नुसार गुन्हा दाखल केला. गौतम हा मनीषासोबत लग्न करण्याच्या तयारीत होता. याचदरम्यान त्याला मनीषा हिचे दुसऱ्याशी संबंध असल्याचे कळले. मनीषाचा मृतदेह ताब्यात घेतल्यानंतर पोलिसांनी तो कांदिवली शताब्दी रुग्णालयात शवविच्छेदनासाठी पाठवला.

मानखुर्द रेल्वे स्थानकावर सापळा रचून केली अटक

बेपत्ता अखिलेशला पकडण्यासाठी पोलिसांच्या टीममध्ये चहुबाजुंनी शोध मोहिमेवर रवाना झाल्या होता. त्याच्या लोकेशनच्या आधारे पोलिसांचे पथक मानखुर्द परिसरात पाठलाग करीत गेले होते, तेव्हा तो मानखुर्द रेल्वे स्टेशनवर असल्याचे आढळले. त्याआधारे पोलिसांनी रेल्वे स्थानकावर सापळा रचून अखिलेशला अटक केली. त्याला रेल्वे स्थानकावर अटक करून कुरार गाव पोलीस ठाण्यात आणले असता चौकशीदरम्यान त्याने खुनाची कबुली दिली. हत्येच्या कारणाबाबत पोलिस चौकशीत त्याने मनीषसोबत माझे जुने प्रेम असल्याचे सांगितले. मी मनिषाशी लग्न करणार होतो. पण मला काही लोकांकडून समजले की तिचे परपुरुषांशी अनैतिक संबंध असल्याचे कळले, त्यातूनच हत्या केल्याचे अखिलेशने पोलिसांसमोर कबूल केले. अतिरिक्त पोलिस आयुक्त महेश पाटील, पोलिस उपायुक्त सोमनाथ घार्गे, सहायक पोलिस आयुक्त राजेंद्र मोहिते, वरिष्ठ पोलिस निरीक्षक सतीश गाडवे यांच्या मार्गदर्शनाखाली कुरार पोलिसांनी या हत्याकांडाचे गूढ 12 तासांत उकलून आरोपीला अटक करण्यात यश मिळवले. (In Malad the girlfriend is killed by her lover due to her immoral relations)