Satara Crime : भांडण लहान मुलांचे अन् मारामारी मोठ्यांची, साताऱ्यात नेमकं काय घडलं?

सातारा / 25 जुलै 2023 : साताऱ्यात एक धक्कादायक घटना उघडकीस आली आहे. लहान मुलांच्या भांडणातून मायलेकीला बेदम मारहाण केल्याची घटना फलटण तालुक्यातील मौजे कुरवली खुर्द येथे उघडकीस आली आहे. याप्रकरणी फलटण पोलीस ठाण्यात पिता-पुत्राविरोधात गुन्हा दाखल करण्यात आला आहे. एकनाथ तोडकर आणि विनोद तोडकर अशी आरोपी पिता-पुत्राची नावे आहेत. क्षुल्लक कारणातून झालेल्या या हाणामारीमुळे गावात खळबळ उडाली आहे. पीडित आणि आरोपी एकमेकांचे शेजारी आहेत. पोलीस पुढील तपास करत आहेत.

काय आहे प्रकरण?

आरोपी आणि पीडित हे शेजारी आहेत. यामुळे आरोपीचा लहान मुलगा आणि पीडितेची लहान मुलगी यांची मैत्री आहे. दोघेही दररोज एकत्र खेळतात. नेहमीप्रमाणे दोघं एकत्र खेळत असताना दोघांमध्ये खेळण्यावरुन वाद झाला. यानंतर दोघांची आई वाद सोडवायला आली असता दोघींमध्ये वादावादी झाली. यात पीडित महिलेची मोठी मुलगीही मध्ये पडली. मग आरोपी पिता-पुत्राने वादात उडी घेतली.

यानंतर वाद मिटण्याऐवजी वाद वाढत गेला. वाद विकोपाला गेल्यानंतर आरोपी पिता-पुत्राने पीडित मायलेकींना मारहाण करण्यास सुरुवात केली. यानंतर पीडित मायलेकींनी फलटण पोलीस ठाणे गाठत पिता-पुत्राविरोधात तक्रार दाखल केली. पोलिसांनी तक्रार दाखल करत पुढील कारवाई सुरु केली आहे.

पीडित महिला विधवा असून, ती आपल्या दोन मुलींसह राहते. मोलमजुरी करुन महिला आपल्या कुटुंबाचा उदरनिर्वाह करते. दरमया, क्षुल्लक कारणातून मालयलेकींना मारहाण केल्याने गावात एकच खळबळ उडाली आहे.