Gaja Marne : पुण्याचा गुंड गजा मारणेची ढाब्यावर पोलिसांसह ‘मटण पार्टी’, काय कारवाई केली त्या पोलिसांवर?

येरवडा कारागृहातून सांगली कारागृहात नेत असताना गुंड गजा मारणे याने ढाब्यावर ‘मटण पार्टी’ केल्याची माहिती उघडकीस आली आहे. या घटनेची गंभीर दखल घेऊन पोलीस आयुक्त अमितेश कुमार यांनी सहायक पोलीस निरीक्षकासह पाच पोलीस कर्मचाऱ्यांना निलंबित करण्याचा आदेश दिला. मारणेला कारागृहात नेत असताना त्याच्याबरोबर मोटारीचा ताफा होता. त्याला ढाब्यावर भेटणाऱ्या सराइतासह तिघांविरुद्ध गुन्हा दाखल करण्यात आला. कोथरूडमध्ये दुचाकीस्वाराला मारहाण केल्याच्या प्रकरणात मारणे आणि साथीदार येरवडा कारागृहात आहेत. सुरक्षेच्या कारणास्तव मारणेला सांगली येथील कारागृहात नेण्यात येत होते. त्या वेळी पोलीस बंदोबस्तावर सहायक पोलीस निरीक्षकासह चार पोलीस कर्मचारी होते.

वाटेत एका ढाब्यावर मारणेची व्हॅन थांबविण्यात आली. बंदोबस्तात असलेल्या सहायक पोलीस निरीक्षकासह पाच पोलीस कर्मचाऱ्यांनी त्याच्याबरोबर ढाब्यावर जेवण केले. मारणेच्या व्हॅनबरोबर असलेल्या मोटारीतील साथीदारांनी मारणेला बिर्याणी नेऊन दिली. मारणेला तेथे सतीश शिळीमकर, विशाल धुमाळ, बाळकृष्ण ऊर्फ पांड्या मोहिते हे भेटले. विशाल धुमाळ याच्याविरुद्ध खुनाचा गुन्हा दाखल आहे. हा सगळा प्रकार सीसीटीव्ही कॅमेऱ्यांनी टिपला.

सहा जणांना निलंबित करण्याचा आदेश

मारणेच्या मटण पार्टीची माहिती पोलीस आयुक्त अमितेश कुमार यांना मिळाली. त्यानंतर या प्रकरणाची गंभीर दखल घेऊन त्यांनी चौकशी केली. चौकशीत दोषी आढळलेल्या सहायक निरीक्षकासह सहा जणांना निलंबित करण्याचा आदेश त्यांनी दिला.

‘मस्त मटण पार्टी झोडली’

पुणे शहरातील कुख्यात गुंड गजा मारणे याने पोलिसांच्या संरक्षणात असताना महामार्गावरील एका ढाब्यावर ‘मटन पार्टी’ आयोजित केल्याचा धक्कादायक प्रकार समोर आला आहे. यावर राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे आश्चर्य व्यक्त केले आहे. त्या म्हणाल्या की, “मोक्का कारवाई अंतर्गत शिक्षा भोगणारा पुण्यातील कुख्यात गुंड गजा मारणे याला येरवडा कारागृहातून सांगली कारागृहात शिफ्ट करताना मारणे आणि पोलिसांनी मस्त मटण पार्टी झोडली अशा बातम्या आहेत”

मोक्का कारवाई अंतर्गत शिक्षा भोगणारा पुण्यातील कुख्यात गुंड गजा मारणे याला येरवडा कारागृहातून सांगली कारागृहात शिफ्ट करताना मारणे आणि पोलिसांनी मस्त ‘मटण पार्टी’ झोडली अशा बातम्या आहेत.

माझी @CMOMaharashtra यांना विनंती आहे की, या प्रकरणी निलंबित केलेल्या पोलिसांना नुसते… pic.twitter.com/Y0dlcsS7qI

— Adv Rohini Eknathrao Khadse (@Rohini_khadse) May 14, 2025

‘कायमस्वरूपी निलंबित करा’

माझी मुख्यमंत्री देवेंद्र फडणवीस यांना विनंती आहे की, या प्रकरणी निलंबित केलेल्या पोलिसांना नुसते निलंबित करून चालणार नाही तर त्यांना कायमस्वरूपी निलंबित केले पाहिजे. त्याशिवाय गजा मारणेने असे आणखी काही लोक पाळून ठेवले आहे का? याचाही तपास केला पाहिजे. नाहीतर कळायचं की मारणेसाठी त्याच्या जवळच्या लोकांनी सांगली कारागृहात अलिशान रुम विथ झकुझी दिला आहे.