Pune Porsche accident : बापरे, आरोपीने 90 मिनिटात पहिल्या पबमध्ये उडवले 48 हजार रुपये, पुणे हिट अँड रन प्रकरण
Pune Porsche accident : पुण्यातील हिट अँड रन प्रकरणामुळे नागरिकांच्या मनात संतापाची भावना आहे. शनिवारी मध्यरात्रीची ही घटना आहे. आरोपी एका बड्या बिल्डरचा मुलगा आहे. त्याने आपल्या आलिशान पोर्शे टायकन कारने एका दुचाकीला उडवलं. यात दोघांनी आपले प्राण गमावले.
पुणे हिट अँड रन प्रकरणामुळे राज्यातील वातवरण तापलं आहे. या बाबत नवीन धक्कादायक माहिती समोर आली आहे. शनिवारी मध्यरात्री पुण्यातील एका प्रसिद्ध बिल्डरच्या मुलाने आपल्या आलिशान पोर्शे टायकन कारने एका दुचाकीला उडवलं. यात तरुण-तरुणीचा मृत्यू झाला. आरोपी अल्पवयीन असून अपघाताच्यावेळी तो दारुच्या नशेत होता. या प्रकरणात आरोपीला जामीन मिळाल्याने वातावरण आणखी तापलं. आरोपी विरोधात कठोरात कठोर कारवाई करावी अशी सर्वांची एकमुखी मागणी आहे. जेणेकरुन इतरांना जरब बसावी. पोर्शे कारने दुचाकीला उडवण्याधी आरोपी वेदांत अग्रवाल दोन पबमध्ये गेला होता. तिथे त्याने मद्यप्राशन केले. आरोपीने पबमध्ये किती पैसे उडवले, त्याची माहिती आता समोर आली आहे.
पुणे पोलीस आयुक्त अमितेश कुमार यांनी ही माहिती दिली. आरोपीने पहिल्या पबमध्ये 90 मिनिटात तब्बल 48 हजार रुपये उडवले. शनिवारी रात्री 10.48 च्या सुमारास आरोपी या पबमध्ये गेला. ब्लाक मॅरियट या दुसऱ्या पबमधून तो रात्री 12.10 च्या सुमारास बाहेर पडला. आरोपीने 48 हजार रुपये बिल पेड केलं, ते बिल पुणे पोलिसांनी मिळवलं आहे. या बिलमध्ये आरोपी आणि त्याच्या मित्रांना जी दारु देण्यात आली, त्याचा सुद्धा समावेश आहे.
ब्लड सॅम्पल रिपोर्ट्ची प्रतिक्षा
“अल्पवयीन आरोपी दोन पबमध्ये गेला. गाडी चालवण्याआधी त्याने मद्यप्राशन केल्याच सीसीटीव्ही फुटेज आमच्याकडे आहे. ब्लड सॅम्पल रिपोर्ट्ची प्रतिक्षा आहे” असं एसीपी मनोज पाटील यांनी सांगितलं. या प्रकरणात आरोपीला सहज जामीन मिळाल्याने नागरिकांचा संताप आणखी वाढला. आरोपी अल्पवयीन असल्याने त्याच्याकडे ड्रायव्हिंग लायसन्स नव्हतं. त्याला पोर्शे कार त्याच्या वडिलांनी दिली होती. काल आरोपीचे वडिल विशाल अग्रवाल यांना पोलिसांनी अटक केली. आज पुणे पोलीस मुलगा आणि वडील दोघांना कोर्टात हजर करतील.
