शेअर मार्केटद्वारे सव्वा कोटींचा गंडा, व्हिएचएस कंपनीचा संचालकाला अखेर बेड्या
शेअर मार्केटमध्ये जास्त परतावा मिळवून देण्याचे आमिष दाखवत लोकांना आपल्या कंपनीत गुंतवणूक करण्यास भाग पाडले. मग ना परतावा दिला ना गुंतवणूक केलेली रक्कम दिली.
सांगली / शंकर देवकुळे : आटपाडी येथे शेअर मार्केटद्वारे सव्वा कोटींचा गंडा घालणाऱ्या भामट्याला जेरबंद करण्यात पोलिसांना यश आले आहे. फसवणूक प्रकरणी आटपाडीतील व्हीएचएस कंपनीचा संचालक अखेर पोलिसांच्या जाळ्यात अडकला आहे. संतोष ढेमरे असे अटक करण्यात आलेल्या आरोपीचे नाव आहे. शेअर मार्केटच्या माध्यमातून कमी कालावधीत जादा परतावा देण्याचे आमिष दाखवून आटपाडी परिसरातील गुंतवणूकदारांना गंडा घातला होता. सुमारे 1 कोटी 27 लाख रुपयांचा गंडा घालणाऱ्या आरोपीला पोलिसांनी जेरबंद केले.
अनेकांची फसवणूक करुन फरार झाला होता
संतोष ढेमरे आणि इतर सहकाऱ्यांच्या मदतीने टीएचएस ट्रेडर्स एलएलपी या कंपनीच्या माध्यमातून अनेकांची आर्थिक फसवणूक केली होती. कमी कालावधीत जास्त नफा मिळवून देण्याचे आमिष दाखवले. या आमिषाला बळी पडत अनेक आटपाडी परिसरातील अनेक नागरिकांनी ढेमरे याच्या कंपनीत गुंतवणूक केली. लोकांनी नफा कमावण्याच्या लालसेपोटी तब्बल 1 कोटी 27 लाख रुपये ढेमरे यांच्या कंपनीत गुंतवले.
नागरिकांनी आटपाडी पोलिसात तक्रार दाखल केली
मात्र नफा तर नाहीच मिळाला, पण गुंतवणूक केलेली रक्कमही मिळाली नाही. आपली फसवणूक झाल्याचे लक्षात येताच नागरिकांनी आटपाडी पोलिसात फसवणुकीची तक्रार दाखल केली. नागरिकांच्या तक्रारीवरुन पोलिसांनी संतोष ढेमरेसह संदीप धोंडिराम ढेमरे, विनोद दादासाहेब कदम, हारुण इस्माईल तांबोळी यांच्यावर आटपाडी पोलिसात फसवणुकीचा गुन्हा दाखल केला.
पुण्यातून सापळा रचून अटक केली
गुन्हा दाखल झाल्यापासून मुख्य संतोष ढेमरे हा फरार होता. पोलीस त्याचा सर्वत्र शोध घेत होते. दरम्यान, आर्थिक गुन्हे शाखेच्या पथकास संशयित संतोष हा पुणे येथील बिबवेवाडी येथे असल्याची गुप्त माहिती मिळाली. त्यानुसार पथकाने बिबवेवाडी येथे सापळा रचून ढेमरे याला अटक केली. आरोपी संतोष ढेमरे यास न्यायालयासमोर हजर केले असता, न्यायालयाने त्याला 12 एप्रिलपर्यंत पोलीस कोठडी सुनावली आहे.
