शस्त्रक्रिया करुन थकलोय आता झोपतो असं सांगितलं, तासाभरानंतर रुग्णालयातील कर्मचाऱ्यांनी केबिनमध्ये पाहिले तर…

चंद्रपूर : शहरात एक धक्कादायक घटना उघडकीस आली आहे. प्रसिद्ध नेत्ररोग तज्ज्ञाचा रुग्णालयातच मृतदेह आढळल्याने एकच खळबळ उडाली आहे. उमेश अग्रवाल असे मयत डॉक्टरचे नाव आहे. डॉक्टरचा मृत्यू नेमका कशामुळे झाला याबाबत संभ्रम आहे. अग्रवाल यांचा मृत्यू काही कारणातून की त्यांनी आत्महत्या केली याबाबत पोलीस तपास करत आहेत. घटनेची माहिती मिळताच पोलिसांनी तात्काळ घटनास्थळी धाव घेत मृतदेह ताब्यात घेतला. मृतदेह शवविच्छेदनासाठी रुग्णालयात पाठवण्यात आला आहे. शवविच्छेदन अहवाल आल्यानंतरच मृत्यूचे कारण स्पष्ट होईल.

कर्मचाऱ्यांना म्हणाले मी थकलोय, उठवू नका

उमेश अग्रवाल हे सुप्रिद्ध नेत्ररोग तज्ज्ञ आहेत. त्यांचे चंद्रपूर शहरात स्वतःच्या मालकीचे साई आय हॉस्पिटल आहे. अग्रवाल यांच्या पत्नी देखील ख्यातनाम डेंटिस्ट आहेत. मुलगा वैद्यकीय शिक्षण घेत आहेत. रुग्णावर शस्त्रक्रिया केल्यानंतर अग्रवाल यांनी रुग्णालयातील कर्मचाऱ्यांना मी खूप थकलोय असे सांगितले. तसेच मला उठवू नका, असेही बजावले.

तासाभरानंतर कर्मचाऱ्यांनी पाहिले अन् धक्काच बसला

मात्र तासभर होऊन गेला तरी डॉक्टरांच्या केबिनमध्ये काहीच हालचाली जाणवत नव्हत्या. त्यामुळे रुग्णालयातील कर्मचाऱ्यांनी केबिनचा दरवाजा उघडून पाहिलं तर कर्मचाऱ्यांना धक्काच बसला. केबिनमध्ये डॉक्टर मृतावस्थेत पडले होते. डॉक्टरांनी आत्महत्या केली की नैसर्गिक मृत्यू झाला, याबाबत अद्याप कळू शकले नाही. पोलीस याबाबत सखोल तपास करत आहेत.