Akola Crime : फ्लॅटमधून अचानक दुर्गंधी येऊ लागली, शेजाऱ्यांनी जावून पाहिले तर पायाखालची जमीनच सरकली !

अकोला / 16 ऑगस्ट 2023 : अकोल्यात एका घटनेने खळबळ उडाली आहे. एका महिला पोलिसाचा मृतदेह राहत्या घरात आढळल्याने पोलीस दलात खळबळ उडाली. एकटेपणाला कंटाळून महिलेने जीवन संपवल्याची घटना उघडकीस आली आहे. वृषाली सरगे असे मयत महिला पोलिसाचे नाव आहे. मयत महिला अकोला शहरातल्या सिटी कोतवाली पोलीस स्टेशनमध्ये गेल्या तीन वर्षापासून कार्यरत होती. दोन दिवसापासून महिला कुणाच्याही संपर्कात नव्हती. अखेर आज सकाळी घरातून दुर्गंधी येऊ लागल्यानंतर घटना उघडकीस आली आहे. महिलेच्या पतीचे आधीच निधन झाले होते. त्यांना काही मूलबाळही नव्हते. पोलिसांनी मृतदेह शवविच्छेदनासाठी रुग्णालयात पाठवला आहे.

काय आहे प्रकरण?

वृषाली सरगे यांचे पती पोलीस दलात नोकरी करत होते. पतीचे अचानक निधन झाल्यानंतर पतीच्या जागी वृषाली यांना नोकरी मिळाली. गेल्या तीन वर्षापासून त्या अकोला शहरात कार्यरत आहेत. त्यांना मूलबाळही नव्हते. तसेच नातेवाईकही फारसे संपर्कात नव्हते. त्यामुळे वृषाली या एकट्या पडल्या होत्या. एकटेपणाला कंटाळून अखेर त्यांनी गीता नगरमधील बेला विस्ता अपार्टमेंटमधील राहत्या घरी हे टोकाचे पाऊल उचलले.

मृत्यूपूर्वी सुसाईड नोट लिहून महिलेने एकटेपणाला कंटाळून जीवन संपवत असल्याचे म्हटले आहे. तसेच आपला मृतदेह नातेवाईकांच्या ताब्यात न देता जिल्हा सामान्य रुग्णालयाला देण्यात यावा असेही म्हटलं आहे. या घटनेमुळे परिसरात एकच खळबळ उडाली आहे. या प्रकरणाचा पुढील तपास जुने शहर पोलीस करत आहेत.