Jawan Firing | सुट्टी नाकारल्याचा राग, जवानाचा वरिष्ठांवर गोळीबार, दोघांचा मृत्यू

पोलीस अधिकाऱ्यांच्या माहितीनुसार, 38 वर्षीय आरोपी सुकांता दास टीएसआरच्या 5 व्या बटालियनमध्ये कार्यरत होता. त्याने सुभेदार मार्का सिंग जमातिया आणि नायब सुभेदार किरण जमातिया या त्याच्या वरिष्ठांची हत्या केली.

फरार आरोपी नगरसेवक संजय तेलनाडे अडीच वर्षांनी गजाआड

TV9 मराठी डिजीटल टीम | Edited By: Anish Bendre | Updated on: Dec 05, 2021 | 10:57 AM

आगरतळा : त्रिपुरा राज्य रायफल्स (टीएसआर) (Tripura State Rifles (TSR) विभागाच्या दोन कर्मचार्‍यांची त्यांच्याच सहकाऱ्याने गोळ्या घालून हत्या केली. सेपाहिजाला जिल्ह्यातील कोनाबोन भागातील एका सैन्य छावणीत शनिवारी ही घटना घडली. सुट्टी नाकारल्याच्या रागातून आरोपी जवानाने हा हल्ला केल्याचा आरोप आहे. आरोपीने आत्मसमर्पण केल्याची माहिती पोलिसांनी दिली.

काय आहे प्रकरण?

पोलीस अधिकाऱ्यांच्या माहितीनुसार, 38 वर्षीय आरोपी सुकांता दास टीएसआरच्या 5 व्या बटालियनमध्ये कार्यरत होता. त्याने सुभेदार मार्का सिंग जमातिया आणि नायब सुभेदार किरण जमातिया या त्याच्या वरिष्ठांची हत्या केली. कारण त्यांनी सुकांताच्या सुट्ट्या मंजूर केल्या नव्हत्या. 2002 पासून तो टीएसआरच्या सेवेत होता.

बंदुकीच्या गोळ्यांचा आवाज ऐकून बटालियनच्या इतर सदस्यांनी घटनास्थळी धाव घेतली. त्यावेळी त्यांना सुभेदार आणि नायब सुभेदार रक्ताच्या थारोळ्यात पडलेले दिसले. त्यांना रुग्णालयात नेण्यात आले, परंतु सुभेदारांना दाखल करण्यापूर्वीच मृत घोषित करण्यात आले, तर नायब सुभेदाराचा उपचारादरम्यान मृत्यू झाला.

आरोपीचे आत्मसमर्पण

सुकांता दासने आमच्यासमोर आत्मसमर्पण केल्यानंतर आम्ही त्याला अटक केली. त्याच्यावर खून आणि शस्त्रास्त्र कायद्याच्या संबंधित कलमांखाली गुन्हा दाखल करण्यात आला आहे. प्राथमिक चौकशी आणि इतर औपचारिकता पूर्ण केल्यानंतर रविवारी त्याला न्यायालयात हजर केले जाण्याची शक्यता आहे, असे एका वरिष्ठ पोलीस अधिकाऱ्याने सांगितले.

मुख्यमंत्री बिप्लब कुमार देब यांनी दोन्ही मृत कर्मचार्‍यांच्या कुटुंबीयांना 5 लाख रुपयांची नुकसान भरपाई देण्याची घोषणा केली.