‘या’ चोरट्यांची शक्कल पाहून तुम्हीही हैराण व्हाल, डिलिव्हरी बॉयला गंडा घालणारे अखेर पोलिसांच्या जाळ्यात
दोघे जण आधी ऑनलाईन वस्तू ऑर्डर करायचे. मग डिलिव्हरी बॉय पार्सल घेऊन आला की त्याला हातोहात गंडवून, पैसे नसल्याचे कारण सांगत फसवायचे.
सांगली / शंकर देवकुळे : ऑनलाईन खरेदी करुन पार्सल घेऊन येणाऱ्या डिलिव्हरी बॉयला गंडा घालणाऱ्या दोघा चोरट्यांना जेरबंद करण्यास पोलिसांना अखेर यश आले आहे. सांगलीच्या स्थानिक गुन्हे अन्वेषण विभागाच्या पथकाने दोघांना अटक केली आहे. महमंद उर्फ जॉर्डन इराणी आणि उम्मत इराणी अशी अटक करण्यात आलेल्या चोरट्यांची नावे आहेत. पोलिसांनी आरोपींकडून सात लाख रुपये किमतीचे 14 मोबाईल जप्त केले आहेत. दोघा आरोपींना न्यायालयात हजर केले असता, पोलिसांनी त्यांना चार दिवस पोलीस कोठडीत ठेवण्याचे आदेश दिले आहेत. आरोपींनी आणखी किती ठिकाणी असा गंडा घातला आहे, याचा पोलीस तपास करत आहेत.
पार्सल घेऊन येणाऱ्या डिलिव्हरी बॉयला गंडा घालायचे
दोघे आरोपी ऑनलाईन मोबाईल ऑर्डर करायचे. मग पार्सल घेऊन आलेल्या डिलिव्हरी बॉयला बोलण्यात गुंतवून किमती मोबाईल हातोहात लंपास करायचे. डिलिव्हरी बॉयला नेट बँकिंगद्वारे पैसे दिल्याचे भासवले जात होते, तर कधी बोलण्यात गुंतवून जोडीदार किंमती मोबाईल काढून त्याऐवजी साबणवडी टाकून पूर्ववत पॅकिंग करायचे. मग पैसे नसल्याचे सांगत पार्सल परत पाठवायचे. गेल्या आठ दिवसात सांगलीसह आटपाडी, कवठेमहांकाळ, जत, पलूस, इस्लामपूर, विटा आदी ठिकाणी ऑनलाईन खरेदी वस्तू घरपोच करणाऱ्यांना फसवण्याचे प्रकार घडले होते.
स्थानिक गुन्हे शाखेकडून दोन आरोपी अटक
याप्रकरणी सांगली गुन्हे शाखेकडे तक्रार आली होती. पोलिसांनी या आरोपींचा शोध सुरु केला. कुपवाड रस्त्यावरील भारत सूतगिरणी येथे दोघे किमती मोबाईल घेऊन उभे असल्याची माहिती मिळताच पोलिसांनी महमंद उर्फ जॉर्डन इराणी आणि उम्मत इराणी यांना ताब्यात घेऊन चौकशी केली. चौकशीत त्यांनी आयफोन, सॅमसंग कंपनीचे 40 ते 70 हजाराचे 14 मोबाईल फसवणूक करुन लंपास केल्याची कबुली दिली आहे.
