लग्नाच्या वाढदिवशी पत्नीचे पतीला अनोखे गिफ्ट, दागिने विकून दिली हत्येची सुपारी, कारण काय?

कोरबा : लग्नाचा वाढदिवस हा प्रत्येक जोडप्याच्या आयुष्यातील महत्वाचा असतो. हा दिवस खास बनवण्यासाठी जोडपं उत्साही असतात. छत्तीसगडमधील एका महिलेनेही लग्नाचा वाढदिवस अनोख्या पद्धतीने विस्मरणीय केला आहे. महिलेने लग्नाच्या वाढदिवशीच सुपारी देऊन पतीची हत्या केली आहे. छत्तीसगडमधील कोरबा जिल्ह्यात ही घटना घडली. या घटनेमुळे जिल्ह्यात एकच खळबळ उडाली आहे. अवघ्या 24 तासात पोलिसांनी हत्येचा उलगडा करत पत्नीसह दोन आरोपींना अटक केली आहे. आरोपींकडून हत्येत वापरलेले हत्यार, रक्ताने माखलेले कपडे, चपला आणि बाईक जप्त करण्यात आले आहे. विशेष म्हणजे सुपारीचे पैसे देण्यासाठी महिलेने आपले दागिने विकले. घटना उघड होताच पोलिसही हैराण झाले.

पती रोज छळ करायचा

पती दररोज छळ करायचा. लग्न झाल्यापासून नवरा नेहमी दारू पिऊन मारहाण करायचा. या छळाला कंटाळून महिलेने पतीचा कायमचा काटा काढायचे ठरवले. यासाठी तिने आपल्या ओळखीच्या तुषार सोनी उर्फ ​​गोपीशी संपर्क साधला. मग पैशाचे आमिष दाखवून पती जगजीवन राम रात्रे याची हत्या करण्यास प्रवृत्त केले. दागिने विकून तिने सुपारीचे पैसे गोळा केले. पतीच्या हत्येसाठी आरोपींना 50 हजार रुपये अॅडव्हान्स पण दिला.

घटनेची माहिती कोरबा येथे दाखल झाले. पोलिसांनी एक पथक तयार केले. सायबर सेल, फॉरेन्सिक एक्स्पर्ट बिलासपूर, श्वान पथकासह पोलीस पथकाने घटनास्थळाची पाहणी केली. जगजीवन राम रात्रे याची पत्नी धनेश्वरी रात्रे हिची चौकशी केली. मात्र ती वारंवार आपला जबाब बदलत होती आणि पोलिसांची दिशाभूल करण्याचा प्रयत्न केला.

पोलिसांनी तिची कसून चौकशी केल्यानंतर तिने गुन्ह्याची कबुली दिली. पतीच्या त्रासाला कंटाळून तिने त्याचा काटा काढल्याचे पोलीस चौकशीत सांगितले. यानंतर पोलिसांनी पत्नीसह दोघांना अटक केली. न्यायालयाने आरोपींना न्यायालयीन कोठडी सुनावली आहे.