पाच महिन्यांपूर्वी लग्न, पत्नीसह केदारनाथला जाण्याचं स्वप्न, पण झोपेत असताना काहीतरी घडलं, सोलापूर हळहळलं

सोलापूर : उत्तर सोलापूर तालुक्यातील अकोलेकाटी येथून एक दुखद घटना समोर आली आहे. लग्नानंतर अवघ्या सहाव्या महिन्यातच 26 वर्षीय तरुणाचं निधन झालं आहे. मृतक तरुणाचं नाव शिवकुंज कुंभार असं होतं. तो नुकतंच 15 फेब्रुवारीला विवाहबंधनात अडकला होता. विवाहानंतर अवघ्या पाच महिन्यातच शिवकुंज याच्या अकाली मृत्यूमुळे सर्वत्र हळहळ व्यक्त केली जात आहे. विशेष म्हणजे तो यावर्षी ऑक्टोबर महिन्यात पत्नीसह केदारनाथला जाणार होता. सर्व गोष्टी सुरळीत असताना अचानक काळाने घाला घातल्याने शिवकुंजचं कुटुंबासह गावकरी हादरले आहेत.

संपूर्ण गावात शोककळा

शिवकुंज आज पहाटे झोपेत असतानाच त्याला हृदयविकाराचा तीव्र झटका आला. त्यातच त्याचं निधन झालं. शिवकुंज हा मनमिळाऊ, निर्व्यसनी होता. तो वडिलधाऱ्यांचा आदर करायचा. त्यामुळे गावकरीदेखील हळहळ व्यक्त करत आहेत. संपूर्ण गावात शोककळा पसरली आहे. शिवभक्त असणाऱ्या शिवकुंज याने सोमवारी (9 ऑगस्ट) म्हणजे श्रावण आरंभाच्या पूर्वसंधेला श्रीक्षेत्र रामलिंग मंदाराचे दर्शन घेतलं होतं.

शिवकुंजच्या अकाली मृत्यूमुळे कुटुंबीय, मित्रमंडळी, नातेवाईकांना धक्का बसला आहे. त्याच्या मृत्यूने अकोलेकाटीत शोककळा पसरली आहे. शिवकुंज याच्या पश्चात आई, वडील, पत्नी, लहान भाऊ आहेत.

ऑक्टोबर महिन्यात पत्नीसह केदारनाथ जाण्याचं स्वप्न अधूरं

शिवकुंज हा सोलापूरमधील एका दुकानात काम करायचा. शिवकुंजला पर्यटनाची भारी आवड असल्याने तो नुकतंच जुलैमध्ये बदामी, ऑगस्टमध्ये दांडेली आणि रविवारी रामलिंगची सफर करुन आला होता. त्याने ऑक्टोबर महिन्यात पत्नीसह केदारनाथलाही जाण्यासाठी सर्व ऑनलाईन बुकिंग केले होते. मात्र काळाने आज त्याला हिरावून घेतले आहे. त्यामुळे सर्वत्र हळहळ व्यक्त होत आहे.

हेही वाचा :

प्रेयसीच्या हत्येप्रकरणी पकडलं, आरोपी म्हणाला, बायकोलाही 2 वर्षापूर्वी पुरलंय!

नांदेडच्या मुख्य वस्तीत बंदुकीचा धाक दाखवून लुटमार, घटना सीसीटीव्हीत कैद