“ओळखलं नाही का? मी नगरसेवकाचा भाऊ” दागिने-पैसे लुटणारा वसईचा भामटा अटकेत

वसई : मला ओळखलं नाही का? मी नगरसेवकाचा भाऊ आहे, मी काय तुझे पैसे घेऊन कुठे पळून जाणार आहे का? तुझे पैसे देणार नाही का? अशा वेगवेगळ्या भुलथापा लावून पैसे, सोन्याचे दागिने, मोबाईल लुटणाऱ्या भामट्याचा वसईत पर्दाफाश करण्यात आला आहे. माणिकपूर पोलिसांनी या भामट्याकडून 137 ग्रॅम सोन्याचे दागिने 6 लाख 19 हजार 650 रुपयांचा मुद्देमाल जप्त करण्यात आला आहे. ( Jewelery thief arrested in Vasai)

वसई, विरार, नालासोपारा, मीरा-भाईंदर परिसरात गुन्हे करून फरार असलेला विजय दत्ताराम तांबे (वय52) या भामट्याला वसई माणिकपूर पोलिसांनी अटक केली आहे. वसई पोलीस ठाण्यात 2015 साली या भामट्यावर अगोदरच फसवणुकीचा गुन्हा दाखल करण्यात आला होता. त्या गुन्हात 1 वर्षांचा कारावास आणि 50 हजार रुपयांच्या दंडाची शिक्षा देखील याने भोगली होती. पालघर, ठाणे, रायगड, मुंबई यासह अन्य परिसरातील पोलीस ठाण्यात याच्या विरोधात 19 च्या वर गुन्हे दाखल आहेत. हा भामटा सध्या रायगड जिल्ह्यातील तळोजा फेज 2, सेक्टर 19, प्लॅट न 16, एक्झॉटिका सोसायटी मधील 806 एल.के मधील रहिवाशी आहे. हा मूळचा भिवंडीतील जाधवनगर शेलारगावचा रहिवाशी आहे. सीसीटीव्हीच्या आधारे माणिकपूर पोलिसांनी या सराईत चोरट्याला अटक करण्यात यश मिळाले आहे. पोलीस तपासात या भामट्याने आपल्या गुन्ह्याची कबुली दिली आहे.

संबंधित बातम्या :

लग्नास नकार दिल्यानं तरुणीला मारहाण, कल्याण पोलिसांनी प्रियकराला 2 तासात ठोकल्या बेड्या

Phone Pe आणि PayTm च्या मदतीने फसवणूक, चोरलेले 6 लाख 46 हजार रुपये पोलिसांनी परत मिळवले

( Jewelery thief arrested in Vasai)