जिथे युतीमध्ये लढलो तिथे… एकनाथ शिंदेंचे महापौर पदाबाबत खळबळजनक वक्तव्य! नव्या चर्चांना उधाण

कित्येक वर्षांनंतर रखडलेला महानगरपालिकेच्या निवडणुका पार पडल्या आहेत. 15 जानेवारी रोजी जवळपास राज्यातील 29 महानगरपालिकांसाठी निवडणुका झाल्या. या निवडणुकांसाठी मुंबईत शिवसेना आणि भाजप महायुती करत एकत्र निवडणूक लढले. या निवडणुकीत भाजप हा सर्वात मोठा पक्ष ठरला. पण आता जेव्हा महापौर पद कोणत्या पक्षाला मिळणार याबाबत चर्चा सुरु असताना उपमुख्यमंत्री एकनाथ शिंदे यांनी खळबळजनक वक्तव्य केले आहेत.

काय म्हणाले एकनाथ शिंदे?

मुंबईत महायुतीचा महापौर होईल असे उपमुख्यमंत्री एकनाथ शिंदे यांनी स्पष्टपणे सांगितले आहे. ठाणे, कल्याण-डोंबिवली, उल्हासनगर यासह महायुती म्हणून जिथे जिथे एकत्र निवडणूक लढलो त्याठिकाणी महायुतीचाच महापौर बनवण्यात येईल असेही त्यांनी सांगितले.

मुंबईमध्ये महानगरपालिका निवडणूकध्ये कोणत्याही एका पक्षाला स्पष्ट बहुमत मिळाले नाही. त्यामुळे शिवसेनेने आपले नगरसेवक पंचतारांकित हॉटेलमध्ये ठेवल्याने याबाबत अनेक तर्क वितर्क लावण्यात येत होते. मात्र या सर्व शंकाकुशंकांना पूर्णविराम देत मुंबित महायुतीचाच महापौर होईल असे शिंदे यांनी स्पष्ट केले आहे. मुंबईकर नागरिकांनी मोठ्या विश्वासाने महायुती म्हणून सेना – भाजपला मतदान केले असून त्यांच्या मतांशी प्रतारणा करून कोणताही वेगळा निर्णय शिवसेना घेणार नाही. नागरिकांनी याबाबत कोणत्याही अफवांवर विश्वास ठेवू नये असेही ते म्हणाले.

यासोबतच ज्या ज्या मनपामध्ये शिवसेना भाजप हे महायुती म्हणून एकत्र निवडणूक लढले आहेत तिथेही महायुतीचाच महापौर बसविण्यात येईल असेही त्यांनी स्पष्ट केले आहे. त्यामुळे मुंबईसह महाराष्ट्रात अन्य काही राजकीय समीकरणे तयार होत असल्याबद्दल सुरू असलेल्या चर्चांमध्ये अजिबात तथ्य नसून मुंबईत शिवसेना भाजप रिपाइं महायुतीचा महापौर होईल असे त्यांनी सांगितले.

महानगरपालिका निवडणुकीत भाजपा नंबर एकचा पक्ष, शिवसेना ठाकरे गट नंबर दोनचा पक्ष, शिवसेना शिंदे गट नंबर तीनचा पक्ष ठरले आहेत. त्यानंतर भाजपाचाच महापौर मुंबई महापालिकेवर होणार असल्याचे सांगितले गेले. मुंबई महापालिकेत भाजप आणि शिवसेना एकत्र लढले असताना देखील असे म्हटले जात होते. आता एकनाथ शिंदे यांनी महायुतीचा महापौर होणार असल्याचे म्हटले आहे.