Phase 2 Lok Sabha Election 2024 : दुसऱ्या टप्प्यासाठी 26 एप्रिलला होणार मतदान, 13 राज्यांतील 89 जागांसाठी मत देणार नागरिक

काही दिवसांपूर्वीच निवडणूक आयोगाने देशातील लोकसभा निवडणुकांच्या तारखांची घोषणा केली. देशभरात एकूण 7 टप्प्यांमध्ये मतदान पार पडणार असून 4 जून रोजी मतमोजणी होऊन अंतिम निकाल जाहीर होईल. पहिल्या टप्प्याचे मतदान 19 एप्रिल रोजी होणार आहे तर 26 एप्रिल रोजी दुसऱ्या टप्प्यातील मतदान होईल.

दुसऱ्या टप्प्यात 13 राज्यांत 89 जागांसाठी मतदान पार पडणार आहे. या टप्प्यासाठी 28 मार्च रोजी अधिसूचना जारी केली जाईल. 4 एप्रिलपर्यंत उमेदवारी अर्ज दाखल करता येणार आहे. 5 एप्रिल रोजी उमेदवारी अर्जांची छाननी होणार असून 8 एप्रिलपर्यंत उमेदवार हे त्यांचा अर्ज मागे घेऊ शकतील.

कोणत्या राज्यांत होणार मतदान ?

दुसऱ्या टप्प्यात ज्या 13 राज्यांमध्ये निवडणूक होणार आहे, त्यामध्ये आसाम, बिहार, छत्तीसगड, कर्नाटक, केरळ, मध्य प्रदेश, महाराष्ट्र, मणिपुर, राजस्थान, त्रिपुरा, उत्तर प्रदेश, पश्चिम बंगाल आणि जम्मू-कश्मीर यांचा समावेश आहे. निवडणुकीच्या दुसऱ्या टप्प्यातील राज्यनिहाय जागांवर नजर टाकल्यास आसाममध्ये 5, बिहारमध्ये 5, छत्तीसगडमध्ये 3, कर्नाटकमध्ये 14, केरळमध्ये 20, मध्य प्रदेशात 7, महाराष्ट्रात 8, मणिपूरमध्ये 1, राजस्थानमध्ये 13, त्रिपुरामध्ये 1, उत्तर प्रदेशमध्ये 8, पश्चिम बंगालच्या 3 आणि जम्मू-काश्मीरच्या 1 लोकसभेच्या जागेसाठी मतदान होणार आहे.

अरुणाचल प्रदेश, अंदमान-निकोबार, आंध्र प्रदेश, छत्तीसगड, दमन द्वीप, दिल्ली, गोवा, गुजरात, हिमाचल प्रदेश, हरियाणा, केरळ, लक्षद्वीप, लडाख, मिझोरम, मेघालय, नागालँड, पाँडिचेरी, सिक्कीम, तामिळनाडू, पंजाब, तेलंगण, उत्तराखंड येथे पहिल्या टप्प्यातच निवडणुका संपतील.

या तीन राज्यात सात टप्प्यात होणार मतदान

तर कर्नाटक, राजस्थान, त्रिपुरा आणि मणिपूर या चार राज्यांमध्ये दोन टप्प्यात निवडणुका होणार आहेत. छत्तीसगड आणि आसाममध्ये तीन टप्प्यात निवडणुका होणार आहेत. ओडिशा, मध्य प्रदेश आणि झारखंडमध्ये चार टप्प्यात मतदान होणार आहे. महाराष्ट्रात पाच टप्प्यात निवडणुकीसाठी मतदान होणार आहे. जम्मू-काश्मीरमध्ये दोन टप्प्यात मतदान होणार आहे. त्याच वेळी, उत्तर प्रदेश, बिहार आणि पश्चिम बंगाल ही तीन राज्ये आहेत जिथे 7 टप्प्यात मतदान होणार आहे.