3 Idiots Sequel Update: ‘3 इडियट्स’च्या सीक्वेलबाबत आमिर खानचा मोठा खुलासा; राजकुमार हिरानी काय करणार?

3 Idiots Sequel Update : बॉलीवूडच्या गल्ल्यांमध्ये सध्या शाहरुख खान याच्या अपकमिंग ‘किंग’ आणि सलमान खानच्या नव्या चित्रपटांबद्दल चर्चा सुरू आहे. तर दुसरीकडे आमिरचे चाहते देखील त्याच्या आगामी चित्रपटाची उत्सुकतेने वाट बघत आहेत. ‘सितारे जमीन पर’ हा त्याचा मागचा चित्रपट गेल्या वर्षी, 20 जून 2025 ला रिलीज झाला. त्यानंतर आमिरच्या कोणत्याही नव्या प्रोजेक्टची ऑफिशिअल घोषणा झालेली नाही. याचदरम्यान आता आणमिर खानने त्याच्या ‘3 इडियट्स’ या चित्रपटाच्या सीक्वेलबद्दल मोठी अपडेट शेअर केली आहे. ज्यामुळे चाहते खूपच उत्सुक आहेत.

आमिर नुकताच, सिंगापूर इंटरनॅशनल फिल्म फेस्टिव्हलमध्ये सहभागी झाला होती, तेव्हा त्याने त्याची सुपरहिट फिल्म ‘3 इडियट्स’ च्या सीक्वेलबद्दल मोकळेपणाने भाष्य केलं. या मोस्ट अवेटेड फिल्मच्या स्क्रिप्टवर काम सुरू असल्याचं त्याने सांगितलं.

‘3 इडियट्स’ सीक्वेल बद्दल लेटेस्ट अपडेट ?

आमिर खानने सांगितलं की, दिग्दर्शक राजकुमार हिरानी सध्या या चित्रपटाच्या स्क्रिप्टवर काम करत आहेत. तो परतल्यानंतर राजकुमार हिरानी त्याला या चित्रपटाची अंतिम कथा ऐकवतील. मात्र, याबाबत आताच अधिक काही सांगणं घाईचं ठरेल, असंही आमिरने स्पष्ट केलं. तरीही, चित्रपटाचं काम वेगाने पुढे जात असल्याचं त्याने नमूद केलं.

का इमोशनल झाला आमिर ?

खरं सांगायचं तर या फिल्म फेस्टिव्हलमध्ये आमिर खान भावूक झाला होता. मंचावर संवाद साधताना त्याने आठवण सांगितली की, कोविड-19 च्या लॉकडाऊनदरम्यान त्याला आयुष्यातील मागील वर्षांचा विचार करण्याची संधी मिळाली. “कोविडच्या काळात मी जेव्हा निवांत बसून विचार करत होतो, तेव्हा माझ्या लक्षात आलं की माझ्या आयुष्यातील जवळपास 30 वर्षं निघून गेली आहेत. एखाद्या कामात एक-दोन किंवा पाच वर्षं पूर्णपणे झोकून देऊन काम करणं ठीक आहे. पण असं सलग 30 वर्षं करत राहिलात, तर याचा अर्थ तुम्ही तुमची नाती गमावली आहेत. आता मुलं मोठी झाली आहेत आणि ती त्यांच्या आयुष्यात व्यस्त झाली आहेत. त्यामुळे मला खूप मोठं नुकसान झाल्याची भावना जाणवली” असं तो म्हणाला.

3 इडियट्सची बॉक्स ऑफिसवरील कामगिरी कशी होती?

2009 मध्ये प्रदर्शित झालेल्या ‘3 इडियट्स’ या चित्रपटाने बॉक्स ऑफिसवर इतिहास रचला होता. राजकुमार हिरानी यांच्या दिग्दर्शनाखाली तयार झालेल्या या चित्रपटाने कमाईचे अनेक मोठे विक्रम मोडले होते. त्या काळातील सर्वाधिक कमाई करणाऱ्या भारतीय चित्रपटांमध्ये या चित्रपटाचा समावेश झाला होता. यामध्ये आमिर खान, शर्मन जोशी आणि आर. माधवन तसेच करीना कपूरची प्रमुख भूमिका होती.