90च्या दशकातील हे गाणं ऐकताच मनाला मिळतो सुकून, 31 वर्षांपासून प्रचंड सुपरहिट

90च्या दशकातील रोमँटिक गाण्यांचा विषय निघाला की अभिनेता सुनील शेट्टी आणि अभिनेत्री सोनाली बेंद्रे यांच्या चित्रपटांचा आवर्जून उल्लेख केला जातो. या जोडीने अनेक गाजलेल्या चित्रपटांमध्ये काम केलं असून त्यांची ऑनस्क्रीन केमिस्ट्रीही प्रेक्षकांच्या पसंतीस उतरली. याच काळातील त्यांचं ‘आंखों में बसे हो तुम’ हे रोमँटिक गाणं आजही संगीतप्रेमींच्या आठवणीत आहे.

नुकतंच या सदाबहार गाण्याला 31 वर्षे पूर्ण झाल्याच्या निमित्ताने संगीतकार आणि गायक अनु मलिक यांनी जुन्या आठवणींना उजाळा दिला. त्यांनी सोशल मीडियावर गाण्याचा व्हिडीओ शेअर करत या गाण्याच्या आठवणींना उजाळा दिला. सुनील शेट्टी आणि सोनाली बेंद्रे यांनी आपल्या सहज आकर्षणाने आणि अदांनी या गाण्यात जीव ओतला असं त्यांनी म्हटलं.

‘आंखों में बसे हो तुम’ आजही लोकप्रिय

‘आंखों में बसे हो तुम, तुझे दिल में छुपा लूंगा’ हे गाणं 1995 मध्ये प्रदर्शित झालेल्या ‘टक्कर’ या रोमँटिक थ्रिलर चित्रपटातील आहे. अभिजीत भट्टाचार्य आणि अलका याज्ञिक यांनी हे गाणं गायलं असून अनु मलिक यांनी त्याला संगीत दिलं आहे. गाण्याची मधुर चाल आणि प्रेमभावना व्यक्त करणारे शब्द यामुळे हे गाणं त्या काळात प्रचंड लोकप्रिय ठरलं.

14 जुलै 1995 रोजी ‘टक्कर’ हा चित्रपट प्रदर्शित झाला होता. भरत रंगाचारी यांनी या चित्रपटाचं दिग्दर्शन केलं होतं. सुनील शेट्टी आणि सोनाली बेंद्रे यांच्यासोबत नसीरुद्दीन शाह, शफी इनामदार, मोहन जोशी, राकेश बेदी आणि कादर खान यांच्याही महत्त्वाच्या भूमिका होत्या.

अनु मलिक यांच्या संगीताचा खास ठसा

अनु मलिक हे चार दशकांहून अधिक काळ भारतीय संगीतविश्वाचा भाग आहेत. ‘बाजीगर’, ‘मैं खिलाड़ी तू अनाड़ी’, ‘बॉर्डर’, ‘जुड़वा’, ‘सोल्जर’, ‘रिफ्यूजी’, ‘जोश’, ‘फिझा’, ‘मर्डर’, ‘नो एंट्री’, ‘मैं हूं ना’ आणि ‘इश्क विश्क’ यांसारख्या चित्रपटांसाठी त्यांनी अनेक लोकप्रिय गाणी दिली आहेत.

संगीतकार म्हणून नाव कमावल्यानंतर अनु मलिक यांनी काही लोकप्रिय गाणी स्वतःही गायली आहेत. ‘गोरी गोरी’, ‘एक गरम चाय की प्याली हो’, ‘ऊंची है बिल्डिंग’ आणि ‘आयला रे लड़की मस्त मस्त’ यांसारखी त्यांची गाणीही गाजली. तसेच त्यांनी ‘इंडियन आयडल’ या लोकप्रिय सिंगिंग रिअॅलिटी शोच्या अनेक सीझनमध्ये परीक्षकाची भूमिका बजावली आहे.