ठरलं रे! थ्री इडियट्सचा सिक्वेल येणार, आमीर खानच्या माहितीने चाहत्यांमध्ये आनंदाची लाट; स्टोरी काय असणार?

Three Idiots 2 : प्रसिद्ध अभिनेत्रा आमीर खान याचा थ्री इडियट्स हा चित्रपट आजही तेवढ्याच उत्सुकतेने पाहिला जातो. या चित्रपटात हाताळलेला विषय आणि त्यातून करण्यात आलेले भाष्य यामुळे तो देश तसेच जगभरात चर्चेचा विषय ठरला. या चित्रपटाचा पुढचा भागही यायला हवा होता, अशी इच्छा अनेकांनी वारंवार बोलून दाखवलेली आहे. आमीर खानचे चाहते तर थ्री इडियट्स-2 हा चित्रपट यायलाच हवा, असा आवर्जुन आग्रह करत असतात. दरम्यान, आता खुद्द आमीर खाननेच त्याच्या चाहत्यांना एक मोठी खुशखबर दिली आहे. आता थ्री इडियट्स या चित्रपटाचा सिक्वेल येणार आहे. म्हणजेच थ्री इडियट्स-2 हा चित्रपट लवकरच येणार आहे. त्यावर सध्या काम चालू आहे, असे आमीर खानने सांगितले आहे.

रँचो, राजू, फरहान पुन्हा एकत्र दिसणार

थ्री इडियट्स-2 या चित्रपटासाठी सध्या स्क्रीप्ट रायटिंगचे काम चालू आहे. चित्रपटाची कथा पूर्ण झालेली आहे. स्क्रीप्टवर आणखी काम करणे गरजेचे आहे, असे आमीर खानने सांगितले आहे. विशेष म्हणजे थ्री इडियट्स-2 या चित्रपटाचे दिग्दर्शनही प्रसिद्ध दिग्दर्शक राजकुमार हिराणी हेच करणार आहेत. लवकरच आता आपल्याला पुन्हा एकदा रँचो, राजू आणि फरहान या तीन जिवलग मित्रांची धम्माल पाहायला मिळणार आहे. आमीर खानने सांगितल्यानुसार या चित्रपटाची कहाणीदेखील थ्री इडियट्स या पहिल्या भागाप्रमाणाच खिळवून ठेवणारी आहे.

चित्रपटाची कहाणी काय असणार आहे?

थ्री इडियट्स-2 या चित्रपटाची कहाणी नेमकी काय असेल, हे अद्याप समोर आलेले नाही. परंतु थ्री इडियट्स हा चित्रपट ज्या ठिकाणी संपला तेथून पुढे 10 वर्षांनी काय काय घडलं, हे सगळं या चित्रपटात सांगण्यात येणार आहे. चित्रपटामध्ये आमीर खान (रँचो, फुंगसुक वांगडू), आर. माधवन (फरहान), शरमन जोशी (राजू रस्तोगी) हे तिघेही एकत्र दिसतील. सोबतच या चित्रपटात करिना कपूरही असेल. विधू विनोद चोडपा या चित्रपटाची निर्मिती करणार आहे. 2009 साली थ्री इडियट्स हा चित्रपट प्रदर्शित झाला होता. आता पुन्हा एकदा थ्री इडियट्स-2 हा चित्रपट लवकरच येणार आहे.