प्रसिद्ध अभिनेत्रीची फसवणूक; कॉन्ट्रॅक्टरने लावला लाखो रुपयांचा चुना

मुंबई- अभिनेत्री संभावना सेठची एका कॉन्ट्रॅक्टरने फसवणूक केली. संभावनाने नुकतंच घर विकत घेतलं. या घराच्या इंटेरिअर डिझायनिंगसाठी तिने एका कॉन्ट्रॅक्टरशी संपर्क साधला होता. मात्र संबंधित ठेकेदाराने तिची फसवणूक केली. घराच्या इंटेरिअरचं सर्व काम त्याच्यावर सोपवल्यानंतर आणि कामाचे पैसे आधीच दिल्यानंतरही आता तो ठेकेदार कामावर येत नसल्याची तक्रार तिने केली. संभावनाने याविषयी सोशल मीडियावर एक व्हिडीओ पोस्ट केला आहे. या व्हिडीओमध्ये तिने संपूर्ण प्रकरणाचा उलगडा केला.

कामाचे पैसे आधीच घेतल्यानंतरही ठेकेदार विविध कारणं देऊन काम टाळत असल्याचं तिने म्हटलंय. कधी स्वत: आजारी असल्याचं सांगून तर कधी कामगार नाही असं म्हणत तो टाळाटाळ करत असल्याची तक्रार संभावनाने केली.

“एखाद्यावर विश्वास तरी कसा करायचा? त्या ठेकेदारावर पूर्ण विश्वास ठेवून मी त्याला आधीच पैसे दिले आणि आमची फसवणूक करून तो पळून गेला. संबंधित व्यक्ती जर कधी तुम्हाला भेटला आणि त्याने असा दावा केला की संभावनाच्या घरी मी इंटेरिअरचं काम केलंय, तर अजिबात विश्वास ठेवू नका”, असं ती या व्हिडीओत म्हणाली. संभावनाचा पती अविनाशसुद्धा या व्हिडीओत राग व्यक्त करताना दिसतो.

याप्रकरणी संबंधित ठेकेदाराविरोधात तक्रार दाखल करण्याचा विचार दोघं करतात. मात्र नंतर पुनर्विचार करत ठेकेदाराकडून काहीही झालं तरी घराचं काम पूर्ण करून घेणार, असं म्हणतात. संभावना सेठचा युट्यूबवर मोठा चाहतावर्ग आहे. रोजच्या जीवनातील घडामोडी ती व्हिडीओच्या माध्यमातून चाहत्यांसोबत शेअर करत असते. तिच्या या व्हिडीओवर अनेकांनी कमेंट्स करत ठेकेदाराविरोधात पोलिसांत तक्रार दाखल करण्याचा सल्ला दिला.