‘तुंबाड 2’ साठी आलिया भट्ट का योग्य ? सोहम शाह स्पष्टच बोलला..

सोह शाह हा त्याच्या ‘तुंबाड’ चित्रपटाचा सिक्वेल घेऊन येतोय. 2018 साली रिलीज झालेल्या या फिल्मचा दुसरा पार्ट लवकरच प्रेक्षकांच्या भेटीस येणार आहे. ‘तुंबाड 2’ साठी सगळेच उत्सुक आहेत. विशेष म्हणजे आता ‘तुंबाड 2’ मध्ये चक्क अभिनेत्री आलिया भट्ट ही दिसणार आहे. त्यामुळे हा चित्रपट पाहण्याची उत्सुकता तर आणखीनच वाढली आहे. या चित्रपटाद्वारे आलिया पहिल्यांदाच एखाद्या हॉरर फिल्ममध्ये काम करणार आहे. मात्र आलियाने या चित्रपटाला होकार कसा दिला, तिची या चित्रपटासाठी निवड कशी झाली, असे अनेक प्रश्न लोकांच्या मनात आहेत, त्याचंच उत्तर आता सोहम साहने दिलं आहे.

अभिनेत्याच्या सांगण्यानुसार, अवघ्या 2 भेटीतच आलिया या चित्रपटात काम करण्यास तयार झाली होती. तिच्यासारख्या मोठ्या अभिनेत्रीसोबत काम करण्याचा अनुभव कसा होता याबद्दलही सोहमला विचारण्यात आलं असता, तो म्हणाला की स्क्रिप्टमधल्या ज्या चांगल्या गोष्टी, प्लस पॉइंट्स होते, ते लगेच तिच्या लक्षात आले. खास गोष्ट म्हणजे हा चित्रपट तयार करणारे लोक काही इंडस्ट्रीतील मोठ्या आणि प्रसिद्ध दिग्दर्शकांसारखे स्थापित नाव नव्हतं, तरीही आलियाने कथेवर विश्वास ठेवला.

आलियाने का निवडला तुंबाड 2 ?

सोहम शाहने ‘व्हरायटी इंडिया’ला दिलेल्या मुलाखतीत आलिया भट्टसोबत काम करण्याचा अनुभव सांगितला. तो म्हणाला, “आम्ही आलियाला चित्रपटाची कथा ऐकवली आणि तिने स्क्रिप्ट वाचली. तिला कथा आणि स्क्रिप्ट दोन्ही आवडल्यामुळे तिने लगेचच होकार दिला. त्यामुळे संपूर्ण प्रक्रिया खूप सहज पार पडली. आलिया कामाच्या बाबतीत अतिशय गंभीर आणि प्रोफेशनल आहे. तिच्यासोबत काम करताना आम्हाला खूप चांगला अनुभव आला.”

सोहमने आलियाच्या अभिनयकौशल्यासोबतच तिच्या व्यावसायिक दृष्टिकोनाचेही कौतुक केले. पहिल्याच भेटीत तिने कथेशी संबंधित काही महत्त्वाचे प्रश्न विचारले होते. त्यावरून चित्रपटातील बारकावे समजून घेण्याची तिची क्षमता लक्षात आल्याचे त्याने सांगितलं. याबाबत सोहम म्हणाला, “आलिया खूप हुशार आणि समजूतदार आहे. ती जितकी उत्तम अभिनेत्री आहे, तितकीच तिची व्यावसायिक समजही चांगली आहे. आमच्या पहिल्या भेटीत तिने काही महत्त्वाचे प्रश्न विचारले होते. नेमके कोणते प्रश्न होते, हे मला आता आठवत नाही. मात्र, तिने कथा ऐकल्यानंतर अवघ्या दोन-तीन दिवसांत स्क्रिप्ट वाचून पूर्ण केली. त्यानंतर आमची पुन्हा भेट झाली आणि केवळ दोन भेटींमध्येच आलियाला चित्रपटासाठी साइन करण्यात आले.”

आलियाला ‘तुंबाड ‘ बद्दल आधीपासूनच माहीत होतं आणि तिला कहाणी आवडली होती, असंही त्याने नमूद केलं. तुंबाड चित्रपट रिलीज होऊन 8 वर्ष उलटली आहे, तर याचा सीक्वेल असलेला तुंबाज 2 डिसेंबर 2027 मध्ये रिलीज होण्याची शक्यता आहे. रिपोर्ट्सनुसार, हा चित्रपट अतिशय मोठ्या स्केलवर तयार करण्यात येत असून मुंबईत 7-8 कोटींचा सेट उभारण्यात आला आहे. चित्रपटाचं बजेट जवळपास 100 कोटी आहे.