‘ही तर बाई संत्या..’; अमृता खानविलकरच्या घरातील अजब नियम ऐकून नेटकऱ्यांना आली संतोष जुवेकरची आठवण
अभिनेत्री अमृता खानविलकरने नुकत्याच दिलेल्या एका मुलाखतीत तिच्या घरातील एक ठरलेला नियम सांगितला. हा नियम ऐकून नेटकऱ्यांना अभिनेता संतोष जुवेकरचीच आठवण आली. नेमकं काय घडलं.. ते सविस्तर वाचा..
अभिनेत्री अमृता खानविलकर नुकत्याच दिलेल्या एका मुलाखतीत तिच्या घराविषयी आणि दररोजच्या रुटीनविषयी मोकळेपणे व्यक्त झाली. यावेळी तिने सांगितलं की तिच्या घरात सकाळी 10 वाजताच्या आधी आणि रात्री 9 वाजल्यानंतर कोणालाच परवानगी नाही. मग अगदी या वेळेत कोणतीही मोलकरीण किंवा इस्त्रीचे कपडे देणाराही घरात येऊ शकत नाही, असं तिने स्पष्ट केलं. यामागचं कारणही अमृताने या मुलाखतीत सांगितलं आहे. तिचा हा व्हिडीओ सोशल मीडियावर व्हायरल होत असून त्यावर विविध प्रतिक्रिया येत आहेत.
काय म्हणाली अमृता?
“माझा सकाळचा वेळ.. म्हणजे माझ्या घरात सकाळी दहाच्या आधी कोणालाच परवानगी नाही. कुठलीही मोलकरीण, जेवण बनवणारी किंवा मदतनीस असो.. इस्त्रीचे कपडे द्यायला कोणीतरी आलंय तरी परवानगी नाहीच. दहाच्या आधी आणि रात्री नऊनंतर माझ्या घरात कोणालाच परवानगी नाही. कारण तो माझा वेळ आहे,” असं ती म्हणाली.
यामागचं सविस्तर कारण सांगताना अमृता पुढे म्हणाली, “मी सकाळी सर्वसाधारणपणे पाच-साडेपाचला उठते. त्यानंतर योगा, घरातली पूजा वगैरे करते. मेडिटेशन आणि जर्नलिंगसुद्धा करते. हे सगळं मला कधीच शिकवलं गेलेलं नाही. हे मी माझं माझं हळूहळू शिकत गेले. अच्छा.. हे केल्यावर हे होतं, खूप भावना मनात दडल्या आहेत, मग त्या मी कोणाला सांगू? सांगितल्याशिवाय त्या लिहून काढायच्या. मी अनेकवेळा दोन-दोन तास लिहित बसली आहे. माझ्या आयुष्यातील सर्वांत कठीण काळात मी इतकं लिहिलंय, इतकं लिहिलंय की आता त्या डायऱ्या कोणाला सापडल्या तर बापरे देव जाणे काय होईल. तिथे लॉकरमध्ये ठेवते. पण हे मी केलंय.”
View this post on Instagram
या व्हिडीओवर नेटकऱ्यांनी काही मजेशीर प्रतिक्रिया दिल्या आहेत. तर काहींनी तिला ट्रोलसुद्धा केलंय. ‘बाई संत्या..’ अशी कमेंट एका युजरने केली. तर ‘नवरा नऊच्या नंतर आला तर’ असा उपरोधिक सवाल दुसऱ्याने केला. ‘कधी काही इमर्जन्सी असेल तर काय करणार’, असंही अनेकांनी म्हटलंय. काहींनी अमृताच्या या नियमाचं कौतुकसुद्धा केलंय. ‘आवडली मलापण ही शिस्त. आपलं आयुष्य, आपला अधिकार, लोकांना आपल्या मधे मेधे नको.. हे माझंपण असंच असतं’, असं नेटकऱ्याने लिहिलंय.
