Ankit Mohan : एकेदिवशी मला न सांगता… प्रमोशनचा वाद अन् निर्मात्यांचे आरोप; अखेर अंकित मोहननं सोडलं मौन

‘देवघर ऑन रेंट’ हा सिनेमा २५ सप्टेंबरला संपूर्ण महाराष्ट्रात प्रदर्शित झालं. मात्र, ट्रेलर लॉन्चपासून या सिनेमाची चर्चा होत आहे. या चित्रपटात मुख्य भूमिका साकारणाऱ्या अभिनेता अंकित मोहनने सिनेमाच्या ट्रेलर लॉन्चला हजेरी लावली नाही. यानंतर सिनेमाचे दिग्दर्शक स्वरुप सावंत आणि निर्मात्यांनी अंकित फोन उचलत नाही असंही सांगितलं. अशातच आता नुकत्याच एका मुलाखतीत अंकित मोहननं या वादावर प्रतिक्रिया दिली असून आपली बाजू मांडली आहे.

सिनेमाच्या वादावर अंकित मोहननं सोडलं मौन

अंकित मोहन म्हणाला की, ‘दीड-दोन वर्षांपूर्वी दिग्दर्शकांनी मला‘देवघर ऑन रेंट’ सिनेमासाठी विचारलेलं. त्यांनी सिनेमाची संपूर्ण कथा सांगितलेली आणि त्यावेळी हा सिनेमा दोन हिरोंचा आहे, असंही सांगितलेलं. एक गँगस्टर आणि एक पोलिसाची भूमिका होती. त्यांनी मला पोलिसाच्या भूमिकेसाठी विचारलं. मी पोलिसांची भूमिका कधी साकारली नव्हती, त्यामुळे नवीन काहीतरी करण्याची संधी मिळाली. नंतर आमचं स्क्रिप्टचं वाचन झालं, लूक टेस्ट झाली. सगळं चांगलं होतं. मी त्यांच्यासाठी इतर प्रोजेक्ट्सना नकार दिला. मी १५ दिवसांचं शूटिंग करून सिनेमाचं शूटिंग केलंय. प्रोडक्शनमध्ये काही ना काही अडचणी असतातच. शूट झालं आणि मग मी माझ्या इतर कामांना लागलो.’

‘पण, एकेदिवशी मला न सांगता त्यांनी निखील चव्हाणचा प्रोमो टीझर शूट करून सिनेमाची घोषणा केली. मला थोडं विचित्र वाटलं. कारण, आधी मला त्यांनी सांगितलेलं की, माझ्या नावाने सिनेमाची घोषणा होईल. त्यानंतरही मी त्यांना याबद्दल विचारलं. पण, त्यांनी सगळ्या गोष्टी एकमेकांवर ढकलायला सुरुवात केली. दुसरा टीझर माझ्या नावाने येईल, असं सांगण्यात आलेलं. पण, तोही रिलीज नाही झालं. पोस्टरसाठीही माझे फोटो काढण्यात आले, पण तेसुद्धा त्यांनी शेअर केले नाहीत. हे सगळं २०२५ मध्ये झालं.’

‘त्यानंतर जानेवारीपासून मला चांगले सिनेमे मिळाले. मी जेव्हा आदिनाथसोबत वेब सीरिज शूट करत होतो, त्यावेळी त्यांनी मला फोन केला आणि अॅक्शन सीन शूट करायचाय असं सांगितलं. त्यावेळी मी त्यांना लगेच होकार दिला.मी दिग्दर्शकांना फोन करत होतो, मेसेज करत होतो. पण, त्यांनी काहीच प्रतिसाद दिला नाही. महिन्याभराने त्यांनी माझ्याशी संपर्क साधला. त्या अॅक्शन सीनमधून मला काढण्यात आलं. मला सांगण्यात आलेलं एक आणि झालं भलतच. हा माझा सिनेमा आहे, असं मला वाटलंच नाही.’

निर्मात्यांनी अंकितवर फोन उचलत नसल्याचा आरोप केला होता. याबद्दल बोलताना अभिनेता म्हणाला की, ‘त्यांनी मला दिलेलं वचन नाही पाळलं, तर मी का कमिटमेंट पाळायची? जर तुम्ही तुमचं वचन पाळलं असतं तर मीसुद्धा माझं वचन पाळलं असतं. मी कामात व्यग्र होतो. एखादा माणूस जर माझ्या नजरेतून उतरला तर तो कायमचा उतरला. मी त्यांना म्हटलं, जे काही बोलायचंय ते माझ्या टीमसोबत बोला. प्रोफेशनली सगळं करूया. प्रीमिअरच्या आधी त्यांनी मला लीगल नोटीस पाठवलेली. पण, तरीही मी प्रीमिअरला गेलेलो.’ ‘राजश्री मराठी’ला दिलेल्या मुलाखतीत अंकित मोहन बोलत होता.