Satish Kaushik | मित्राला अखेर निरोप देताना ढसाढसा रडले अनुपम खेर; भावूक करणारा व्हिडीओ
अनुपम खेर, अभिषेक बच्चन, रणबीर कपूर, जॉनी लिव्हर, जावेद अख्तर, बोनी कपूर, पंकज त्रिपाठी, सलमान खान यांसारख्या कलाकारांनी आपल्या लाडक्या सहकलाकाराला अंतिम निरोप देण्यासाठी एकच गर्दी केली होती. अभिनेता सलमान खानचाही एक व्हिडीओ सोशल मीडियावर व्हायरल होत आहे.
मुंबई : बॉलिवूडचे दिग्गज अभिनेते आणि दिग्दर्शिक सतीश कौशिक पंचतत्वात विलीन झाले. त्यांच्या अंत्यदर्शनासाठी बॉलिवूडमधील कलाकारांनी एकच गर्दी केली होती. सतीश कौशिक बुधवारी मित्रांसोबत होळी साजरी करण्यासाठी दिल्लीला गेले होते. रात्री छातीत दुखू लागल्याने त्यांना फोर्टिस रुग्णालयात दाखल करण्यात आलं. मात्र उपचाराआधी त्यांचं निधन झालं. हृदयविकाराच्या झटक्याने त्यांचं निधन झालं. शवविच्छेदनाची प्रक्रिया पूर्ण झाल्यानंतर चार्टर विमानाने पार्थिव मुंबईत आणण्यात आलं. अनुमप खेर, अनिल कपूर आणि सतीश कौशिक हे तिघेही जिगरी मित्र म्हणून ओळखले जातात. कौशिक यांच्या निधनाची वार्ता सर्वांत आधी अनुपम खेर यांना समजली. त्यांनीच सोशल मीडियावर पोस्ट लिहित सगळ्यांना कौशिक यांच्या निधनाची माहिती दिली.
अनुपम खेर आणि सतीश कौशिक यांची जवळपास 45 वर्षे जुनी मैत्री होती. सोशल मीडियावर सध्या एक व्हिडीओ व्हायरल होत आहे. यामध्ये अनुपम खेर हे ॲम्ब्युलन्समध्ये कौशिक यांच्या पार्थिवाजवळ बसलेले दिसत आहेत. यावेळी त्यांना अश्रू अनावर झाले. हा व्हिडीओ पाहून चाहतेसुद्धा भावूक झाले आहेत.
View this post on Instagram
View this post on Instagram
अनुपम खेर, अभिषेक बच्चन, रणबीर कपूर, जॉनी लिव्हर, जावेद अख्तर, बोनी कपूर, पंकज त्रिपाठी, सलमान खान यांसारख्या कलाकारांनी आपल्या लाडक्या सहकलाकाराला अंतिम निरोप देण्यासाठी एकच गर्दी केली होती. अभिनेता सलमान खानचाही एक व्हिडीओ सोशल मीडियावर व्हायरल होत आहे, ज्यामध्ये तो अत्यंत भावूक दिसत आहे.
View this post on Instagram
अनुपम खेर यांची पोस्ट
‘मृत्यू हेच अंतिम सत्य आहे, याची मला जाणीव आहे. पण माझा जिवलग मित्र सतीश कौशिकबद्दल हे लिहावं लागेल, याचा मी स्वप्नातही विचार केला नव्हता. 45 वर्षांच्या मैत्रीला अचानक पूर्णविराम मिळाला. सतीशविना आयुष्य आधीसारखं कधीच नसेल,’ अशा शब्दांत त्यांनी भावना व्यक्त केल्या होत्या.
जावेद अख्तर यांची पोस्ट
‘प्रेम आणि विनोदाची ऊब असलेला सतीश गेल्या 40 वर्षांपासून माझ्या भावासारखा होता. तो माझ्यापेक्षा 12 वर्षांनी लहान.. सतीशजी.. आता तुमची वेळ नव्हती’, अशा शब्दांत प्रसिद्ध कवी आणि गीतकार जावेद अख्तर यांनी भावना व्यक्त केल्या आहेत.
सतीश कौशिक यांनी त्यांच्या कारकिर्दीत जवळपास 100 चित्रपटांमध्ये काम केलं आहे. मात्र 1987 मध्ये प्रदर्शित झालेल्या ‘मिस्टर इंडिया’ चित्रपटातील कॅलेंडर या त्यांच्या भूमिकेने त्यांना पहिल्यांदा लोकप्रियता मिळवून दिली. फक्त अभिनय क्षेत्रातच न रमता त्यांनी पटकथा लेखन आणि दिग्दर्शन क्षेत्रातही स्वत:ला आजमावून पाहिलं.
