Elvish Yadav | एल्विश यादवने दुबईत तब्बल इतक्या कोटींना घेतलं आलिशान घर; पहा खास झलक
बिग बॉस ओटीटीच्या दुसऱ्या सिझनच्या विजेत्याने दुबईत आलिशान घर खरेदी केलं आहे. एल्विश यादवने त्याच्या व्लॉगद्वार या घराची झलक चाहत्यांना दाखवली आहे. वयाच्या अवघ्या 26 व्या वर्षी त्याने हे यश संपादित केलं आहे.
मुंबई | 14 सप्टेंबर 2023 : ‘बिग बॉस ओटीटी 2’च्या दुसऱ्या सिझनमध्ये युट्यूबर्स आणि सोशल मीडिया इन्फ्लुएन्सर्स यांचाच दबदबा पाहायला मिळाला. प्रसिद्ध युट्यूबर एल्विश यादवने या सिझनचं विजेतेपद आपल्या नावे केलं. ‘बिग बॉस ओटीटी 2’ हा रिअॅलिटी शो जिंकल्यापासून एल्विशच्या लोकप्रियतेत प्रचंड वाढ झाली आहे. म्युझिक व्हिडिओपासून ते चित्रपटांपर्यंत त्याला असंख्य ऑफर्स येत आहेत. नुकताच त्याने अभिनेत्री उर्वशी रौतेलासोबत एक म्युझिक व्हिडिओ शूट केला. त्यानंतर आता एल्विशने दुबईमध्ये स्वत:चं आलिशान घर खरेदी केलं आहे. या घराची झलक त्याने आपल्या वाढदिवशी चाहत्यांना दाखवली.
एल्विश यादवने त्याच्या 26 व्या वाढदिवसाच्या आधी एक नवीन व्लॉग शेअर केला. या व्हिडिओमध्ये त्याने दुबईतील घर दाकवलं आहे. एल्विशने दुबईमध्ये हक्काचं घर खरेदी केलं असून या घराची किंमत तब्बल आठ कोटी रुपये असल्याचं म्हटलं जातं आहे. मात्र एल्विशने याबद्दल अद्याप कोणतीही अधिकृत प्रतिक्रिया दिलेली नाही. व्लॉगमध्ये एल्विशच्या घरातील प्रत्येक कोपरा दाखवण्यात आला आहे. दुबईमधलं त्याचं घर अत्यंत सुंदर आणि आलिशान असल्याचं पाहायला मिळत आहे.
एल्विश त्याचा 26 वा वाढदिवस साजरा करत असून त्यानिमित्त सोशल मीडियावर चाहत्यांकडून शुभेच्छांचा वर्षाव होतोय. या खास दिनानिमित्त उर्वशी रौतेलासोबतचा त्याचा म्युझिक व्हिडिओसुद्धा लाँच करण्यात आला आहे. या म्युझिक व्हिडिओमध्ये दोघांची जोडी खूप चांगली दिसतेय, असं नेटकऱ्यांनी म्हटलं आहे. गेल्या काही दिवसांपासून उर्वशी आणि एल्विश या गाण्याचं प्रमोशन करत होते.
वाइल्ड कार्डद्वारे बिग बॉसच्या घरात एण्ट्री घेणारा एल्विश जवळपास 50 दिवसांपेक्षा अधिक काळ तिथे टिकून राहिला. याआधी वाइल्ड कार्डद्वारे आलेला कोणताच स्पर्धक विजेता ठरला नव्हता. एल्विशने प्रसिद्ध युट्यूबर अभिषेक मल्हान, अभिनेत्री पूजा भट्ट, मनीषा राणी, बेबिका धुर्वे यांना हरवलं. बिग बॉसची ट्रॉफी आणि 25 लाखांचं रोख बक्षीस त्याने आपल्या नावे केलं.
एल्विश यादव आणि अभिषेक मल्हान या दोघांमध्ये ‘कांटे की कट्टर’ होती. त्यांना मिळालेल्या मतांमध्ये फार कमी फरक होता. एल्विश यादवला फिनालेमध्ये 54 टक्के मतं मिळाली तर अभिषेकला 46 टक्के मतं मिळाली होती. म्हणजेच फक्त आठ टक्क्यांच्या फरकाने एल्विश हा शो जिंकला. बिग बॉसच्या इतिहासात पहिल्यांदाच इतकी तगडी स्पर्धा पहायला मिळाली. जिथे मतांमध्ये फक्त आठ टक्क्यांचा फरक होता.
