Brahmastra Trailer: थक्क करणारी दृश्यं, डोळे दिपवून टाकणारं VFX; रणबीर-आलियाच्या भव्यदिव्य ‘ब्रह्मास्त्र’चा ट्रेलर पाहिलात का?

अयान मुखर्जी दिग्दर्शित ‘ब्रह्मास्त्र’ (Brahmastra) या बहुचर्चित आणि बहुप्रतिक्षित चित्रपटाचा ट्रेलर प्रदर्शित झाला आहे. 2014 मध्ये या चित्रपटाची घोषणा झाली. तेव्हापासूनच या चित्रपटाची प्रचंड उत्सुकता प्रेक्षकांमध्ये आहे. एकूण तीन भागांमध्ये हा चित्रपट प्रदर्शित होणार असून पहिल्या भागाचा ट्रेलर नुकताच प्रेक्षकांच्या भेटीला आला आहे. ‘ब्रह्मास्त्र: शिवा’ (Brahmastra part one shive) असं या पहिल्या भागाचं नाव आहे. यामध्ये अभिनेता रणबीर कपूर (Ranbir Kapoor) शिवा ही भूमिका साकारतोय. तर आलिया भट्ट इशाच्या भूमिकेत आहे. याशिवाय अमिताभ बच्चन, नागार्जुन, मौनी रॉय अशी स्टारकास्ट आहे. येत्या 9 सप्टेंबर रोजी हा चित्रपट प्रदर्शित होणार आहे. जवळपास तीन मिनिटांच्या या ट्रेलरमध्ये बऱ्याच गोष्टींविषयी उत्सुकता निर्माण केलेली आहे. पौराणिक कथा आणि त्याला आधुनिकतेची जोड देऊन एक वेगळ्याच आशयाचा हा चित्रपट अयान मुखर्जीने तयार केला आहे. हा चित्रपट तयार व्हायला बराच अवधी लागला. तो का लागला असेल, याची कल्पना हा ट्रेलर पाहून येते.

फँटसी, ॲडव्हेंचर, वाईटाविरोधातील चांगल्याचा लढा, प्रेम अशा सर्वच गोष्टी या ट्रेलरमध्ये पहायला मिळतात. ब्रह्मास्त्र आणि शिवाचं काही खास नातं असतं. इतरांसारखाच सर्वसामान्य वाटणाऱ्या शिवाकडे काही विशिष्ट ताकद असतात, ज्यामुळे तो आगीत कधीच जळू शकत नाही. त्याची इशा नावाच्या तरुणीशी भेट होते. या दोघांमधील प्रेम खुलत असतानाच दुसऱ्या विश्वात काही वेगळ्या घडामोडी घडत असतात. ब्रह्मास्त्र मिळवण्यासाठी शत्रूंची धडपड आणि त्या सर्वांमध्ये अडकलेला शिवा.. याची झलक ट्रेलरमध्ये दाखवण्यात आली आहे. यामध्ये मौनी रॉय ही नकारात्मक भूमिकेत असल्याचं दिसून येतंय.

पहा ट्रेलर-

स्टार स्टुडिओज, धर्मा प्रॉडक्शन्स, प्राइम फोकस आणि स्टारलाइट पिक्चर्स निर्मित हा चित्रपट एकूण पाच भाषांमध्ये प्रदर्शित होणार आहे. हिंदी, तमिळ, तेलुगू, मल्याळम आणि कन्नड या भाषांमध्ये हा चित्रपट प्रेक्षकांच्या भेटीला येणार आहे. ‘बाहुबली’चे दिग्दर्शक एस. एस. राजामौली यांनी दक्षिणेतल्या चार भाषांमध्ये या चित्रपटाची प्रस्तुती केली आहे. त्यामुळे रणबीर कपूर हा राजामौली यांच्यासोबतही चित्रपटाचं प्रमोशन करताना दिसला होता.